15 İyun - Qurtulşdan Suverenliyə

15 İyun Azərbaycan xalqının taleyində sadəcə təqvim günü deyil, dövlətçiliyimizin xilası, milli birliyin bərpası və müasir Azərbaycanın təməlinin qoyulduğu tarixi dönüş nöqtəsidir. 1992-1993-cü illərdə ölkədə hökm sürən siyasi xaos, idarəçilik böhranı, hakimiyyətdə olan AXC-Müsavat cütlüyünün səriştəsiz fəaliyyəti Azərbaycanı faktiki olaraq parçalanma və vətəndaş qarşıdurması təhlükəsi ilə üz-üzə qoymuşdu. Dövlət institutları iflic vəziyyətinə düşmüş, iqtisadiyyat çökmüş, orduda pərakəndəlik yaranmış, torpaqlarımızın işğalı davam edirdi.

Belə bir ağır və taleyüklü məqamda xalqın təkidli tələbi ilə Ulu Öndər Heydər Əliyevin hakimiyyətə qayıdışı Azərbaycanın xilası oldu. 15 İyun 1993-cü ildə Heydər Əliyevin Azərbaycan Ali Sovetinin Sədri seçilməsi ölkəmizin siyasi tarixində yeni mərhələnin başlanğıcını qoydu. Məhz buna görə də həmin gün xalqımız tərəfindən Milli Qurtuluş Günü kimi qəbul edilir.

Heydər Əliyev özünün böyük siyasi təcrübəsi, qətiyyəti və uzaqgörənliyi ilə dövlətçiliyin məhvinin qarşısını aldı, Azərbaycanı vətəndaş müharibəsindən xilas etdi və milli həmrəyliyi təmin etdi. O dövrdə ən vacib amillərdən biri Heydər Əliyev və xalq birliyinin formalaşması oldu. Bu birlik dövlətçilik ideyasını milli maraqların fövqünə qaldırdı və Azərbaycanın gələcək inkişaf strategiyasının əsasını təşkil etdi.

Ulu Öndərin rəhbərliyi altında hüquqi, demokratik dövlət quruculuğu prosesi başlandı, Konstitusiya qəbul edildi, insan hüquq və azadlıqlarının təmin olunması istiqamətində mühüm addımlar atıldı. Eyni zamanda vətəndaş cəmiyyəti institutlarının formalaşdırılması, azad medianın inkişafı, siyasi plüralizmin genişləndirilməsi üçün zəruri şərait yaradıldı. Azərbaycanın iqtisadi dirçəlişini təmin edən taleyüklü qərarlar qəbul edildi, neft strategiyası həyata keçirildi və ölkə beynəlxalq münasibətlər sistemində etibarlı tərəfdaş kimi möhkəmləndi.

2003-cü ildən etibarən Prezident İlham Əliyev tərəfindən Heydər Əliyev siyasi kursunun müasir dövrün tələblərinə uyğun şəkildə uğurla davam etdirilməsi Azərbaycanın inkişafında yeni mərhələ yaratdı. Güclü iqtisadiyyatın qurulması, müasir ordunun formalaşdırılması, regional liderlik mövqeyinin möhkəmləndirilməsi və beynəlxalq nüfuzun artması nəticəsində Azərbaycan öz tarixinin ən qüdrətli dövrünə qədəm qoydu.

Bu siyasətin ən möhtəşəm nəticəsi 2020-ci ildə əldə edilən tarixi Zəfər və ölkəmizin ərazi bütövlüyünün böyük hissəsinin bərpası oldu. 2023-cü ildə həyata keçirilən antiterror tədbirləri nəticəsində Azərbaycanın dövlət suverenliyi bütün ərazilərində tam təmin edildi. Beləliklə, bir əsrdən artıq müddətdən sonra Azərbaycan ilk dəfə olaraq öz sərhədləri daxilində tam suverenliyini təmin etmiş, bütöv və güclü dövlət kimi yeni inkişaf mərhələsinə qədəm qoymuşdur.

Bu gün "Qurtuluşdan Suverenliyə" ifadəsi sadəcə siyasi şüar deyil, tarixi reallıqdır. Əgər 15 İyun 1993-cü ildə dövlətçiliyimiz xilas edilməsəydi, Azərbaycanın bugünkü gücündən, sabitliyindən, beynəlxalq nüfuzundan və tarixi qələbələrindən danışmaq mümkün olmazdı. Milli Qurtuluş Günü Azərbaycan xalqının müdrik seçiminin, Heydər Əliyev siyasi irsinin və dövlətçilik ənənələrinin təntənəsinin simvoludur. Bu yolun məntiqi nəticəsi isə suveren, qüdrətli, bütöv və gələcəyə inamla addımlayan Azərbaycandır.

Bəhruz Quliye
Səs qəzetinin baş redaktoru Fəlsəfə üzrə fəlsəfə doktoru

Telegramda izləyin