"Emosiyaları boğmaq yox, idarə etmək lazımdır" - AÇIQLAMA

"Bəzi insanlar düşünür ki, emosiyaları idarə etmək hissləri boğmaq deməkdir. Xeyr, bu belə deyil. İnsan öz hisslərini tanımalı, anlamalı və onları uyğun şəkildə ifadə etməyi bacarmalıdır".

Bu sözləri Sonxeber.az-a psixoloq Samirə Bağırova danışıb.

O, açıqlamasında qeyd edib ki, insan hiss etdiklərini nə qədər dəqiq tanıyırsa, impulsiv davranış ehtimalı da bir o qədər azalır:

"Bəzən buna "təmkinli" və ya "çox mədəni insan" deyirlər. Əslində isə bu cür görünən insan hisslərinin fərqindədir və emosiyalarını basdırmır, onları idarə etməyi bacarır.

Bəzi insanlar "mən əsəbiyəm" mesajını ətrafa yaymaqla əslində diqqət çəkməyə çalışırlar. Xüsusilə bizim cəmiyyətdə öz əsəbiliyini nümayiş etdirməklə diqqət çəkmək, özünü mərkəzə qoymaq və qarşı tərəfi susdurmaq kimi manipulyativ davranışlara tez-tez rast gəlinir.

"Mən əsəbiyəm" hissini "özümü haqsızlığa uğramış hiss edirəm" düşüncəsi ilə əvəz edib onu daha dəqiq müəyyənləşdirdikdə, insanın həm vəziyyətə, həm də özünə yanaşması dəyişir.

Ani emosional partlayışlara isə çox vaxt emosiyaların uzun müddət boğulması, stress, yuxusuzluq, fiziki yorğunluq və emosional nəzarətin zəifləməsi səbəb olur.

Hesab edirəm ki, gələcəkdə cəmiyyətin daha sağlam təfəkkürə sahib olması üçün təhsilin ilk iki ili emosiyaların tanınmasına və idarə olunmasına, eləcə də mənəviyyat və mənəvi dəyərlərin aşılanmasına həsr edilməlidir. Çünki cəmiyyətdə insanların böyük bir hissəsi hiss etdiyi duyğunun adını belə dəqiq ifadə edə bilmir".

Vüsalə İbrahimli

Telegramda izləyin