Sosial mediada etiraz dalğası yaradan iş elanı - FOTO

Türkiyənin İzmir şəhərinin Çiğli rayonunda fəaliyyət göstərən bir şirkətin ofis üzrə inzibati köməkçi vakansiyası üçün paylaşdığı iş elanı geniş müzakirələrə səbəb olub.

Sonxeber.az türk mediasına istinadən xəbər verir ki, elana əsasən, vakansiyaya yalnız 18-40 yaş aralığında olan qadın namizədlər müraciət edə bilər. İş elanında namizəd üçün irəli sürülən bəzi tələblər isə sosial şəbəkə istifadəçilərinin narazılığına səbəb olub.

Belə ki, elanda əməkdaşın "açıq geyim tərzinə üstünlük verməsi" və işgüzar səfərlərdə rəhbəri müşayiət etməsi şərt kimi göstərilib. Bundan əlavə, vakansiyada məxfilik məsələsinə xüsusi vurğu edilməsi diqqət çəkib.

İş elanında təklif olunan maaşın 135 min türk lirəsinə qədər olması müzakirələri daha da artırıb. İstifadəçilər elanda qeyd olunan qeyri-adi tələblərin və yüksək əməkhaqqının vakansiyanın əsl məqsədi ilə bağlı suallar yaratdığını bildiriblər.

Sosial şəbəkələrdə çoxsaylı istifadəçi sözügedən elanı tənqid edərək, bunun əmək bazarında etik normalara uyğun olmadığını qeyd edib.

Vakansiyada yer alan şərtlər və məxfilik tələbi ictimaiyyətdə şübhələr doğurub və "Burada əsl məqsəd nədir?" sualını gündəmə gətirib.

Məsələ ilə bağlı şirkətin rəsmi açıqlaması hələlik yayılmayıb.

Telegramda izləyin