ABŞ-də dəhşətli qəza: Təyyarə magistral yola düşdü, ölən var

ABŞ-nin Texas ştatının Laredo şəhərində kiçik təyyarə magistral yolda qəzaya uğrayıb.

Bu barədə Oxu.Az "Associated Press"ə istinadən xəbər verir.

Məlumata görə, təyyarənin göyərtəsində 6 nəfər olub, onlardan biri həlak olub.

Qəzadan sonra təyyarə alovlanıb. Sosial şəbəkələrdə şahidlərin lentə aldıqları hadisə anının videoları yayılıb, görüntülərdə alovlar içində qalan təyyarənin magistral yolda yanı üstə düşdüyü əks olunub.

Bir neçə sürücü içəridəki insanları çıxarmaq üçün pilot kabinəsinin pəncərəsini sındırmağa çalışıb. Şahidlərdən biri bildirib ki, təyyarədən üç yeniyetmə və bir "pilota bənzəyən" şəxs çıxıb. Daha bir ekipaj üzvü huşu özündə olmayan sərnişini kabinədən çıxarmağa çalışıb.

Hazırda magistral yolda hər iki istiqamətdə nəqliyyatın hərəkəti dayandırılıb. Qəzanın səbəbi hələlik məlum deyil.

Telegramda izləyin