İctimai qınaq qorxusu insanın gündəlik qərarlarına nə dərəcədə təsir edir? - AÇIQLAMA

Müasir cəmiyyətdə insanların davranışlarına təsir edən ən güclü amillərdən biri də ictimai qınaq qorxusudur. Bir çox hallarda insanlar öz istəklərinə və düşüncələrinə uyğun deyil, ətraf mühitin və cəmiyyətin onlardan gözlədiyi şəkildə qərarlar qəbul edirlər.

Bu qorxu bəzən şəxsi münasibətlərdən tutmuş peşə seçiminə, həyat tərzinə və gündəlik davranışlara qədər müxtəlif sahələrdə özünü göstərir.

Bəs ictimai qınaq qorxusu insanın gündəlik qərarlarına nə dərəcədə təsir edir?

Psixoloq Gülsər Qədirli bu barədə Sonxeber.az -a açıqlama verib:

"Ictimai qınaq qorxusu insanın gündəlik qərarlarına düşündüyümüzdən daha çox təsir edir. İnsan sosial varlıqdır və qəbul olunmaq, aid olmaq ehtiyacı daşıyır. Məhz buna görə də ətrafındakı insanların fikirləri onun davranışlarına birbaşa təsir göstərə bilir.

Bir çox insanlar geyim seçimindən tutmuş təhsil, peşə, evlilik və hətta şəxsi fikirlərini ifadə etməyə qədər müxtəlif məsələlərdə cəmiyyətin reaksiyasını nəzərə alırlar. Bəzən insan daxilən istəmədiyi bir qərarı yalnız qınanmaqdan və ya tənqid olunmaqdan qorxduğu üçün qəbul edir. Bu vəziyyət xüsusilə kollektiv düşüncənin güclü olduğu cəmiyyətlərdə daha çox müşahidə olunur.

İctimai qınaq qorxusu müəyyən həddə qədər sosial normalara uyğunlaşmağa kömək etsə də, həddindən artıq olduqda insanın fərdiliyini məhdudlaşdıra bilər. Belə şəxslər öz ehtiyac və istəklərini arxa plana keçirir, başqalarının gözləntilərinə uyğun yaşamağa çalışırlar. Nəticədə zamanla narazılıq, özünəinamın azalması, narahatlıq və emosional gərginlik yarana bilər.

Sağlam psixoloji vəziyyət üçün insan başqalarının fikirlərini nəzərə almaqla yanaşı, öz dəyərlərini və ehtiyaclarını da qorumağı bacarmalıdır. Əks halda həyatını öz seçimlərinə deyil, ətrafın reaksiyalarına uyğun qurmuş olur ki, bu da uzunmüddətli perspektivdə psixoloji yorğunluğa səbəb ola bilər"

Telegramda izləyin