Firuzə İskəndərova: "Mingəçevir Dövlət Universitetinin RUR reytinqində ilk iştirakdan əldə etdiyi nəticə mühüm uğurdur"

Mingəçevir Dövlət Universiteti (MDU) ilk dəfə nüfuzlu "Round University Ranking" (RUR) beynəlxalq universitet reytinqində təmsil olunub.
Universitet ilk iştirak ilində Azərbaycan ali təhsil müəssisələri arasında 12-ci yerdə qərarlaşıb. Bu nəticə MDU-da son illərdə təhsilin keyfiyyətinin yüksəldilməsi, elmi-tədqiqat fəaliyyətinin gücləndirilməsi, beynəlxalq əməkdaşlığın genişləndirilməsi və institusional inkişaf istiqamətində həyata keçirilən məqsədyönlü fəaliyyətin mühüm göstəricisi hesab olunur.

Mingəçevir Dövlət Universitetinin İctimai əlaqələr və marketinq şöbəsinin müdiri, mətbuat katibi Firuzə İskəndərovanın sözlərinə görə, universitetin beynəlxalq reytinqdə ilk dəfə yer alması MDU-nun inkişaf strategiyasının uğurla həyata keçirildiyini göstərir:

"RUR kimi nüfuzlu beynəlxalq reytinqdə ilk iştirakımızdan etibarən ölkə üzrə 12-ci yerdə qərarlaşmağımız universitetimizin inkişaf yolunda mühüm nailiyyətdir. Bu nəticə professor-müəllim heyətinin, əməkdaşlarımızın və tələbələrimizin birgə əməyinin göstəricisidir. Qarşıdakı illərdə beynəlxalq görünürlüğümüzü daha da artırmaq, elmi fəaliyyət və tədrisin keyfiyyətini yüksəltmək istiqamətində fəaliyyətimizi davam etdirəcəyik".
Qeyd edək ki, RUR reytinqində universitetlər tədris, tədqiqat, beynəlxalq müxtəliflik və maliyyə dayanıqlılığı göstəriciləri əsasında qiymətləndirilir. Mingəçevir Dövlət Universiteti dünya üzrə 1198-ci yerdə qərarlaşıb.

Telegramda izləyin