Cəmiyyətin uğurlu hesab etdiyi şəxslər niyə özlərini xoşbəxt deyil, tükənmiş hiss edirlər? - AÇIQLAMA

Müasir dövrdə uğur çox vaxt yüksək gəlir, nüfuzlu vəzifə, aktiv sosial həyat və ya cəmiyyətdə tanınmaqla ölçülür.

Kənardan baxdıqda hər şeyə sahib görünən bəzi insanlar isə daxildə yorğunluq, mənasızlıq hissi və emosional tükənmə yaşayırlar.

Bəs cəmiyyətin uğurlu hesab etdiyi şəxslər niyə özlərini xoşbəxt deyil, tükənmiş hiss edirlər?

Mövzu ilə bağlı psixoloq Gülsər Qədirli bu barədə Sonxeber.az -a açıqlama verib.

"Cəmiyyətdə uğurlu görünən insanların daxilən tükənmiş hiss etməsinin bir neçə psixoloji səbəbi var. İlk növbədə, uğur hər zaman daxili məmnunluq demək deyil. İnsan bəzən həyatını öz istəklərinə görə deyil, ailənin, cəmiyyətin və ya ətraf mühitin ondan gözlədiyi standartlara uyğun qurur. Nəticədə müəyyən nailiyyətlər əldə etsə də, daxilində boşluq hissi yarana bilir.

Digər mühüm səbəb isə daimi performans təzyiqidir. Uğurlu insanlar çox vaxt əldə etdiklərini qorumaq, daha böyük nəticələr göstərmək və başqalarının gözləntilərini doğrultmaq məcburiyyəti hiss edirlər. Bu isə uzun müddət davam etdikdə emosional və psixoloji tükənməyə səbəb olur.

Bəzi insanlar öz dəyərlərini yalnız uğurları ilə əlaqələndirirlər. Onlar düşünürlər ki, sevilmək və qəbul edilmək üçün daim daha yaxşı nəticələr göstərməlidirlər. Belə yanaşma insanın özünü davamlı olaraq sübut etməsinə və heç vaxt tam razılıq hiss etməməsinə gətirib çıxarır.

Sosial şəbəkələrin təsiri də burada az rol oynamır. İnsanlar adətən həyatlarının yalnız uğurlu tərəflərini nümayiş etdirdikləri üçün həm özləri, həm də başqaları üçün ideal obraz yaratmağa çalışırlar. Bu obrazı qorumaq isə əlavə psixoloji yük yaradır.

Emosional tükənmənin əsas əlamətləri arasında daimi yorğunluq, motivasiya itkisi, həyatdan zövq ala bilməmək, əsəbilik, diqqət problemləri və mənasızlıq hissi yer alır. Belə hallarda insanın yalnız karyera və nəticələrə deyil, şəxsi ehtiyaclarına, istirahətinə, münasibətlərinə və emosional sağlamlığına da diqqət ayırması vacibdir. Çünki həqiqi psixoloji rifah yalnız xarici uğurlarla deyil, daxili balans və məmnunluq hissi ilə formalaşır".

Telegramda izləyin