İsti havalarda bunu etməyin - Tromboz riski artır

Yay aylarında yüksək temperatur, kifayət qədər maye qəbul edilməməsi və uzun müddət hərəkətsiz qalmaq damar sağlamlığı üçün ciddi risk yaradır. Ürək-damar cərrahiyyəsi üzrə mütəxəssis, professor doktor Uğursay Kızıltepe isti havalarda xüsusilə diqqət edilməli məqamları açıqlayıb.

Qaynarinfo xəbər verir ki, havanın isinməsi ilə orqanizm daha çox maye itirir. Kifayət qədər su içilmədikdə qan daha qatı hala gəlir və bu vəziyyət xüsusilə venoz (toplardamar) sistemində problemlərə səbəb ola bilir. Tərləmə ilə yaranan maye itkisi əvəz olunmadıqda qan dövranı yavaşlayır və tromboz riski yüksəlir.

Uzun müddət oturmaq və yolçuluqlar

Uzun müddət hərəkətsiz qalmaq, xüsusilə avtomobil və təyyarə səfərlərində qanın laxtalanmasına səbəb ola bilər. Bu vəziyyət dərin vena trombozu riskini artırır. İsti hava, susuzluq və immobilizasiya bir araya gəldikdə risk daha da yüksəlir.

Mütəxəssislər uzun yolçuluqlarda hər 1-2 saatdan bir qısa hərəkət etməyi, ayaq biləyi hərəkətləri yerinə yetirməyi və bol maye qəbul etməyi tövsiyə edir. Dar geyimlərdən uzaq durmaq və mümkün olduqda yüngül kompressiya corablarından istifadə etmək də faydalıdır.

Əlamətlərə diqqət

Tromboz bəzi əlamətlərlə özünü göstərə bilər. Xüsusilə bir ayaqda qəfil şişkinlik, ağrı, qızartı, istilik artımı və həssaslıq diqqətə alınmalıdır. Bu əlamətlər olduqda dərhal tibb müəssisəsinə müraciət edilməlidir.

Bəzi hallarda laxta ağciyərə keçərək həyati risk yarada bilər. Bu zaman qəfil nəfəs darlığı, sinə ağrısı, ürəkdöyünmə və huş itirmə hissi kimi əlamətlər ortaya çıxa bilər və təcili tibbi müdaxilə tələb olunur.

Risk qrupları

İrəli yaşlı şəxslər, varikoz və venoz çatışmazlığı olanlar, əvvəllər tromboz keçirmiş insanlar və ürək-damar xəstəliyi olanlar daha yüksək risk qrupuna daxildir.

Bundan əlavə, piylənmə, siqaret istifadəsi, hamiləlik, doğuşdan sonrakı dövr və hormonal kontraseptiv istifadə edən qadınlarda da risk artır. Uzun müddət hərəkətsiz qalan şəxslər də diqqətli olmalıdır.

Qoruyucu tədbirlər

Mütəxəssislər xüsusilə 11:00-16:00 aralığında günəş altında uzun müddət qalınmamasını, yüngül və rahat geyim seçilməsini, gəzintilərin isə səhər və ya axşam saatlarında planlaşdırılmasını tövsiyə edir. Daimi hərəkət və düzgün maye qəbulu damar sağlamlığı üçün əsas şərtlərdən biridir.

Xroniki xəstəliyi olanlar, xüsusilə qan durulducu dərman qəbul edənlər həkim göstərişi olmadan müalicələrini dəyişməməlidir.

Telegramda izləyin