46 min vergi borcu, 20 min cərimə - "Brand Lux Trade And Distribution"un bu filialları bağlandı

"Brand Lux Trade And Distribution" Məhdud Məsuliyyətli Cəmiyyətində (MMC) aparılan yoxlama zamanı ciddi pozuntular aşkarlanıb.

Qaynarinfo-nun məlumatına görə, şirkətin qanuni təmsilçisi və icraçı direktor Hüseynov Rüfət Xalıq oğlu barəsində İnzibati Xətalar Məcəlləsinin 192.1-ci (əmək müqaviləsi (konktraktı) hüquqi qüvvəyə minmədən işəgötürən tərəfindən fiziki şəxslərin hər hansı işlərin (xidmətlərin) yerinə yetirilməsinə cəlb edilməsi) maddəsi ilə inzibati xəta haqqında iş üzrə icraat başlanıb və məhkəmədə baxılıb.

Məlum olub ki, Rüfət Hüseynov şirkətin icraçı direktor, Əhmədov Elfat Eldar oğlu isə baş direktorudur.

"Brand Lux Trade And Distribution" MMC-də satışın idarə olunması və işin gedişinə nəzarət vəzifəsi Rüfət Hüseynovun, işçilərin işə qəbulu və işdən azad edilməsi isə Elfad Əhmədovun səlahiyyətində olub. 200-ə yaxın şəxsin çalışdığı şirkət əsasən regionlar üzrə qida və qeyri-qida məhsullarının satışını həyata keçirir.

O da məlum olub ki, 2025-ci ilin iyun ayından etibarən şirkətin Gəncə, Bərdə və Quba filiallarının xeyli sayda əməkdaşı əmək haqlarını ala bilməyiblər. Həmçinin, "Brand Lux Trade And Distribution" MMC rəhbərliyi əmək müqaviləsi hüquqi qüvvəyə minməyən xeyli sayda işçini Gəncə şəhərində yerləşən filialda işlərə cəlb edib. Bütün bunlar əmək haqqı almayan işçilərin müvafiq dövlət qurumlarına etdikləri şikayət əsasında üzə çıxıb.

Məhkəmədə Rüfət Hüseynov bildirib ki, 2024-cü ilin avqust ayından etibarən rəhbərlik etdiyi müəssisənin işində böhran yaranmağa başlayıb və fəaliyyət həcmi azalıb. Şirkət Bərdə, Quba, Bakı və Gəncə şəhərlərində filiallarla fəaliyyət göstərib. Biznesin kiçildilməsi qərarı qəbul edildikdən sonra Gəncə, Bərdə və Quba filialları bağlanıb. O, işçilərə debitor borcların olduğunu da etiraf edib. 2025-ci ilin aprel ayında sözügedən filialların fəaliyyət dayandırılarkən orada çalışan əməkdaşların müştərilərə satdığı məhsullar üzrə borclar yaranıb. Şirkət tərəfindən bu borcların təsdiq olunması və geri qaytarılmasının təmin edilməsi məqsədilə əməkdaşlarla borc müqavilələri bağlanıb və onların əmək fəaliyyətlərinə xitam verilib. O, qeyd olunanlara əsasən, barəsində tərtib olunmuş inzibati xəta haqqında iş üzrə icraata xitam verilməsini xahiş edib.

Məhkəmənin hökmü ilə şirkətin qanuni təmsilçisi və icraçı direktoru Rüfət Hüseynov İXM-nin 192.1-ci maddəsində nəzərdə tutulmuş inzibati xətanı törətməkdə təqsirli bilinib və 20.000 manat məbləğində cərimə olunub.

Qeyd edək ki, hüquqi ünvanı Quba Şəhəri, Vaqif küçəsi, ev 41A-da yerləşən, nizamnamə kapitalı 10 AZN olan şirkətin Dövlət Vergi Xidmətinin 3 saylı Ərazi Vergilər İdarəsinə 46.640,64 AZN vergi borcu da var.

Telegramda izləyin