İlan sancmasının əlamətləri nələrdir və belə vəziyyətdə necə davranmaq lazımdır? - AÇIQLAMA

Yay aylarında havaların istiləşməsi ilə insanların təbiətə üz tutması ilan sancması hallarının da artmasına səbəb olur.

Mütəxəssislər bildirirlər ki, ilan sancmaları bəzən yüngül keçsə də, zəhərli ilanların hücumu ciddi sağlamlıq problemlərinə, hətta ölümə səbəb ola bilər.

Bəs ilan sancmasının əlamətləri nələrdir və belə vəziyyətdə necə davranmaq lazımdır?

Mövzu ilə bağlı terapevt Ülviyyə Əliyeva Sonxeber.az -a açıqlama verib:

"İlan sancmasının ilk əlamətləri adətən sancılan nahiyədə ağrı, qızartı və şişkinlik şəklində özünü göstərir. Bununla yanaşı, insanda ürəkbulanma, qusma, başgicəllənmə, halsızlıq, tərləmə və ürəkdöyünmənin sürətlənməsi müşahidə oluna bilər. Ağır hallarda nəfəsalma çətinliyi, görmənin bulanıqlaşması, arterial təzyiqin düşməsi və huşun itməsi də baş verə bilər.

İlan sancan şəxs ilk növbədə sakitləşdirilməli və hərəkəti minimuma endirilməlidir. Çünki fiziki aktivlik zəhərin orqanizmdə daha sürətlə yayılmasına səbəb ola bilər. Sancılan ətraf hərəkətsiz saxlanmalı, zərərçəkən isə mümkün qədər tez tibbi müəssisəyə çatdırılmalıdır.

El arasında geniş yayılmış bəzi üsullar təhlükəli ola bilər. Məsələn, yaranın kəsilməsi, zəhərin sorulmağa çalışılması, turniket bağlanması və ya sancılan yerə buz qoyulması tövsiyə edilmir. Bu müdaxilələr vəziyyəti daha da ağırlaşdıra bilər.

İlan sancmalarında vaxtında tibbi yardımın göstərilməsi həyati əhəmiyyət daşıyır. Buna görə də belə hallarda özbaşına müalicə üsullarına əl atmaq əvəzinə dərhal təcili tibbi yardıma müraciət etmək lazımdır".

Telegramda izləyin