Saxta pasportla Fransaya getmək istəyən əcnəbi Bakıda HƏBS EDİLDİ

Bakıda hava limanında əcnəbi vətəndaş saxlanılıb.

Sonxeber.az Lent.az-a istinadla xəbər verir ki, buna səbəb onun sərhəd nəzarəti məntəqəsinə saxta sənəd təqdim etməsidir.

İttiham aktına görə, Banqladeş Xalq Respublikasının vətəndaşı olan 25 yaşlı Ho Al Avropa ölkələrində işləmək məqsədilə əvvəlcə Şri-Lankaya gedib. Burada o, özünü turizm işçisi kimi təqdim edən Ariflə tanış olub və Avropaya getmək üçün ona 5 min dollar pul verib. Arif də Ho Alın fotosu və məlumatlarından istifadə edərək, saxta Şri-Lanka pasportu hazırladıb. O, bu üsulla Şri-Lankanın paytaxtı Kolombodan Dubaya, oradan da Bakıya gəlib. Banqladeşli Fransaya getməyi planlaşdırıb və Arifdən aldığı pasportu sərhəd nəzarəti məntəqəsinə təqdim edib.

Bu zaman sərhədçilər sənədin saxta olduğunu müəyyən edərək, onu saxlayıblar.

Nəticədə Ho Al barəsində cinayət işi başlanıb. O, ifadəsində əməlindən peşman olduğunu deyib və öz ölkəsinə ekstradisiya olunması üçün kömək istəyib.

Məhkəmənin qərarı ilə Banqladeş vətəndaşı 7 ay müddətinə azadlıqdan məhrum edilib.

Telegramda izləyin