"Bu gün Azərbaycan ordusu maddi-texniki təchizatı və döyüş qabiliyyəti baxımından dünyanın ən güclü orduları sırasındadır" - DEPUTAT

Azərbaycan Silahlı Qüvvələrinin yaranmasının 108 ili tamam olur. Silahlı Qüvvələrimizin əsası 26 iyun 1918-ci ildə Azərbaycan Xalq Cümhuriyyəti Nazirlər Şurasının qərarı ilə yaradılmış Əlahiddə Azərbaycan Korpusu ilə qoyulub. 1918-ci il sentyabrın 15-də Nuru Paşanın rəhbərlik etdiyi Qafqaz İslam Ordusu və Azərbaycan Korpusu Bakını erməni-bolşevik qüvvələrindən azad etdi.Bakının azad olunması ilə Azərbaycan Xalq Cümhuriyyətinin paytaxtı Gəncədən Bakıya köçürüldü.

Şərqdə ilk demokratik respublika olan Azərbaycan Xalq Cümhuriyyəti dövründə əsası qoyulmuş Milli Ordu quruculuğu 1991-ci ildə müstəqilliyini yenidən qazanan Azərbaycan Respublikasında tarixi varislik prinsipi əsasında yeni mərhələyə qədəm qoydu.

Azərbaycan ordusu həm maddi-texniki təchizatı, həm də döyüş qabiliyyəti baxımından dünyanın ən güclü orduları sırasnda layiqli yer tutur. Azərbaycan Silahlı Qüvvələri bunu 2020-ci ildə Vətən müharibəsində döyüş meydanında sübut edə bildi.Ordumuz öz üzərinə düşən çox ağır olduğu qədər də çox şərəfli tarixi bir vəzifəni layiqincə yerinə yetirdi və 30 il işğal altında qalan torpaqlarımızı cəmi 44 gün ərzində azad etdi.2023-cü il sentyabrın 19-20-də keçirilən sürətli və çox uğurlu antiterror əməliyyatı ilə bütün ərazilərimizdə süverenliyimiz təmin olundu.Azərbaycan Silahlı Qüvvələri 2020-ci il noyabrın 8-də İkinci Qarabağ müharibəsi zamanı strateji əhəmiyyətli Şuşa şəhərini işğaldan azad etməsi, bu müharibənin taleyində həlledici rol oynamaqla yanaşı,həm də Xüsusi Təyinatlı Qüvvələrimizin sıldırım qayalara dırmaşaraq yüngül silahlarla apardığı unikal dağ əməliyyatı Azərbaycan əsgərinin nəyə qadir olduğunu bütün dünyaya nümayiş etdirdi.Yalnız dron və Pilotsuz Uçuş Aparatları üstünlüyü ilə deyil, həm də canlı qüvvənin misilsiz cəsarəti və qeyri-standart hərbi düşüncəsi ilə əldə edilmiş bu şanlı qələbənin şərəfinə noyabrın 8-i Azərbaycanda ZƏFƏR GÜNÜ kimi qeyd olunur.Şuşa əməliyyatı xüsusi təyinatlı qüvvələrin peşəkarlığına əsaslanaraq təbii dağ istehkamının ələ keçirildiyi unikal hərb tarixidir.O, dünyada quru qoşunlarının ağır texnikadan istifadə etmədən, şəhərin infrastrukturunu dağıtmadan qalib gəldiyi yeni strategiya kimi tarixə düşüb. Şuşaya tanklar və ya ağır artilleriya ilə daxil olmaq əvəzinə, əsgərlərin meşə və sıldırım qayalarla əlbəyaxa döyüş taktikası seçildi.Bu, dünya hərb tarixində mühüm presedent yaratdı.Əməliyyatda iştirak edən xüsusi təyinatlıların yüksək fiziki hazırlığı, qrup və ya kiçik dəstələr halında manevr etmə bacarığı müasir hərbi dərsliklərdə xüsusi tədqiqat obyektinə çevrilmişdir.

Bu gün Azərbaycan Silahlı Qüvvələri vətənin keşiyində duran,dövlətimizin dayağı olan qüdrətli ordu səviyyəsinə çatdırılıb. Azərbaycan Silahlı Qüvvələri regionun ən güclü və müasir hərbi potensialına malik ordularından biridir.Ordumuz ən yeni texnologiyalar, yüksək dəqiqlikli silahlar, müasir hava hücumundan müdafiə sistemləri və Pilotsuz Uçuş Aparatları (PUA) ilə təmin edilib.Azərbaycan Silahlı Qüvvələrinin şəxsi heyəti yüksək peşəkarlıq nümunələrindən biri kimi ən yüksək standartlara uyğunlaşdırılıb.Ordumuzun əsas missiyası dövlətin ərazi bütövlüyünü və təhlükəsizliyini təmin etmək, hərbi təhdidlərin qarşısını almaq, sərhədləri qorumaq və dövlət maraqlarını müdafiə etməkdir.

Bu gün üçrəngli bayrağımızın Azərbaycanın bütün ərazisində əzəmətlə dalğalanmamasını təmin edən Silahlı Qüvvələrimiz, qalib ordu olmaqla yanaşı həm də yaşadığımız regionda sülhün qarantı rolunu oynayır.

26 İyun-Silahlı Qüvvələr Gününü hərbi rəşadət, şərəf və igidlik bayramına,Azərbaycan xalqınının-qalib xalqa çevrilməsi yolunda canlarından keçmiş bütün şəhidlərimizin xatirəsini ehtiramla yad edir, Vətən naminə hərbi əməliyyatlar zamanı yaralanan,sağlamlığını itirən döyüşçülərimizə Allahdan şəfa diləyirik.Azərbaycanın hərbi qüdrətinin artması,müdafiəsinin güclənməsi naminə müqəddəs və şərəfli xidmət sahiblərinə ehtiramımız bildirir,davamlı uğurlar arzulayırıq!

Əli Məsimli
Milli Məclisin deputatı

Telegramda izləyin