"Biz Silahlı Qüvvələr Gününü artıq müzəffər ordu və qalib xalq kimi qeyd edirik" - Vüqar İskəndərov

"Artıq Müzəffər Ali Baş Komandanın rəhbərliyi ilə 26 İyun - Silahlı Qüvvələr Günü qalıb xalq kimi qeyd edirik. 26 İyun - Silahlı Qüvvələr Günü təkcə hərbi bayram deyil, həm də dövlətçilik tariximizin, milli təhlükəsizlik strategiyamızın və müstəqilliyimizin möhkəmləndirilməsi istiqamətində əldə olunmuş nailiyyətlərin təntənəsi kimi də qiymətləndirmək olar".

Bunu Sonxeber.az-a danışan Milli Məclisin deputatı Vüqar İskəndərov bildirib.

Deputat qeyd edib ki, Azərbaycan Ordusunun keçdiyi şərəfli inkişaf yolunu, dövlətimizin müdafiə potensialının gücləndirilməsi istiqamətində həyata keçirilən ardıcıl siyasətin nəticəsi olaraq torpaqlarımız işğaldan azad olunmuş və soydaşlarımız öz dədə-baba yurdlarına geri qayıdırlar:

"Ulu Öndər Heydər Əliyevin başladığı milli dövlət quruculuğu strategiyasında ordu məsələsi hər zaman önəmli olub. Müstəqilliyin ilk illərində ölkənin üzləşdiyi əsas problemlərdən biri nizami ordunun olmaması və müxtəlif silahlı dəstələrin fəaliyyət göstərməsi idi. 1993-cü ildə xalqın təkidli tələbi ilə hakimiyyətə qayıdan Ulu Öndər Heydər Əliyev ölkədə siyasi sabitliyi təmin etməklə yanaşı, peşəkar və vahid komandanlığa tabe olan Milli Ordunun formalaşdırılmasına başladı. Ulu öndər Heydər Əliyevin yenidən qayıdışından etibarən Azərbaycan Silahlı Qüvvələri keyfiyyətcə yeni inkişaf mərhələsinə qədəm qoydu.1994-cü ildə atəşkəsin əldə olunması ordunun struktur baxımından möhkəmləndirilməsi, maddi-texniki bazasının gücləndirilməsi və döyüş hazırlığının yüksəldilməsi üçün əlverişli şərait yaratdı. NATO ilə əməkdaşlıq proqramlarına qoşulma, beynəlxalq sülhməramlı əməliyyatlarda iştirak və hərbi təhsil sisteminin inkişafı Azərbaycan Ordusunun müasir standartlara uyğunlaşdırılmasında mühüm rol oynadı. Ən önəmlisi isə Ulu Öndər Heydər Əliyevin 1998-ci il 22 may tarixli Fərmanı ilə iyunun 26-sının Silahlı Qüvvələr Günü elan olunması onun ordu quruculuğuna verdiyi yüksək qiymətin göstəricisidir. Ulu öndər Heydər Əliyevin başladığı siyasəti uğurla davam etdirən cənab prezident İlham Əliyev ordu quruculuğu sahəsində atdığı addımlar sayəsində Azərbaycan öz gücü hesabına ərazi bütövlüyümüzü tam bərpa edib. Bu gün Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ordu quruculuğu siyasəti yeni mərhələyə yüksəlib. Dövlət başçısının həyata keçirdiyi məqsədyönlü siyasət nəticəsində Silahlı Qüvvələrin maddi-texniki təchizatı əsaslı şəkildə yenilənib, hərbi büdcə dəfələrlə artırılıb, ən müasir silah və texnologiyalar arsenalımıza daxil edilib. Nəticədə Azərbaycan Ordusu regionun ən güclü hərbi qüvvələrindən birinə çevrilib. Azərbaycan Ordusunun gücü real döyüş meydanlarında öz təsdiqini tapıb. 2016-cı ilin Aprel döyüşləri və 2018-ci ilin Günnüt əməliyyatı Silahlı Qüvvələrimizin yüksək döyüş hazırlığını nümayiş etdirib. 2020-ci ilin 44 günlük Vətən müharibəsində isə Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu işğal altındakı torpaqları azad edərək tarixi ədaləti və ölkənin ərazi bütövlüyünü bərpa edib. 2023-cü ilin sentyabr ayında həyata keçirilən lokal xarakterli antiterror tədbirləri nəticəsində Azərbaycanın dövlət suverenliyi ölkənin bütün ərazisində tam təmin olunub. Cəmi bir gün davam edən əməliyyat Azərbaycan Ordusunun çevikliyini, peşəkarlığını və müasir döyüş imkanlarını bir daha nümayiş etdirib. Məhz buna görə də bu gün Azərbaycan Ordusu yalnız regionun deyil, Avrasiyanın ən müasir və peşəkar Silahlı Qüvvələrindən biri hesab olunur. Komando birliklərinin yaradılması, Milli Müdafiə Universitetinin fəaliyyətə başlaması, Türkiyə Silahlı Qüvvələrinin təcrübəsinə uyğun struktur islahatlarının həyata keçirilməsi ordunun gələcək inkişafının əsas istiqamətlərini müəyyən edir. Müdafiə sənayesinin inkişafı da milli təhlükəsizlik sisteminin mühüm komponentinə çevrilib. Yerli hərbi sənaye müəssisələrində istehsal olunan müasir silah və texnika ölkənin müdafiə imkanlarını genişləndirməklə yanaşı, strateji müstəqilliyi də gücləndirir. Bu gün hərbi qulluqçularımıza dövlətimiz tərəfindən xüsusi diqqət və qayğı göstərilir. Hərbi qulluqçuların sosial müdafiəsinin gücləndirilməsi, mənzil təminatı, əməkhaqlarının artırılması və sosial təminat mexanizmlərinin təkmilləşdirilməsi dövlətin hərbçilərə göstərdiyi xüsusi diqqət və qayğının göstəricisidir".

Telegramda izləyin