"Fransa Ermənistan vasitəsilə regionumuzda öz maraqlarını həyata keçirməyə çalışır" - DEPUTAT

"Fransanın Cənubi Qafqazdakı fəaliyyəti regionda sülh və sabitliyi pozmağa yönəlib. Fransa hələ də Dağlıq Qarabağ münaqişəsinin bitdiyini qəbul etmək istəmir".

Bunu Sonxeber.az-a danışan Aydın Hüseynov bildirib.

Deputat qeyd edib ki, Fransanın Ermənistanı silahlandırması və hərbi əməkdaşlığı genişləndirməsi regionda militarizmi təşviq edir və yeni münaqişə ocaqlarının yaranmasına şərait yaradır. Bu da təbii ki, Ermənistanda revanşist qüvvələri cəsarətləndirir və Azərbaycanın ərazi bütövlüyü və suverenliyinə hörmətsizliyi təşviq edir. Fransanın Azərbaycana qarşı qərəzli mövqeyi anlaşılan deyil. Atılan addımlar bir daha Fransanın Cənubi Qafqazda sülh və sabitliyin təmin olunmasında maraqlı olmadığını sübut edir. Bu gün Fransa Ermənistan vasitəsilə regionumuzda öz maraqlarını həyata keçirməyə çalışır. Əlbəttə ki, bu yolverilməzdir.

Nədənsə ərazi bütövlüyünü və suverenliyimizin bərpa edilməsi rəsmi Parisə rahatlıq vermir. Fransanın ölkəmizə qarşı əvvəl gizlin olan aqressiv mövqe 44 günlük Vətən müharibəsi zamanı və ondan sonrakı mərhələdə daha da artdi. BMT Təhlükəsizlik Şurasının daimi üzvü olan Fransa beynəlxalq hüququ tapdalayaraq işğalçı Ermənistana açıq dəstək verib. Bu ölkənin parlamentinin İkinci Qarabağ müharibəsindən sonra qəbul etdiyi sənədlər, separatçı rejimi tanımaq cəhdləri bunun göstəricisidir".

Deputat vurğulayıb ki, hazırda Azərbaycanla Ermənistanın arasında davam eden sülh danışıqları və əldə edilən irəliləyiş Fransanı narahat edir:

"Bir neçə gün öncə Fransa Milli Assambleyasına təqdim olunmuş sənəddə reallıqların təhrif olunması bu ölkənin Azərbaycana qarşı qərəzli mövqeyini bir daha təsdiqləyir. Fransadan sülhə xidmət etməyən və regionda sabitliyi pozan addımları və eləcə də ölkəmizə qarşı apardığı qarayaxma kampaniyasını sonlandırmasını tələb edirik".

Telegramda izləyin