İşıq və yanacaq yoxdur: Ukrayna zərbələrinə görə Krım qeyri-müəyyənliyə qərq olub - CNN

Ukraynanın Krımda Rusiya hərbi və enerji infrastrukturuna endirdiyi zərbələrin nəticələri hiss olunmağa davam edir.

Qaynarinfo CNN-ə istinadən xəbər verir ki, Sevastopolda elektrik enerjisinin verilməsinə məhdudiyyətlər tətbiq olunub, yarımadada yanacaq satışı məhdudlaşdırılıb, uşaq yay düşərgələrinin fəaliyyəti isə müvəqqəti dayandırılıb.

Kremlin təyin etdiyi Sevastopol rəhbəri Mixail Razvojayev şəhərdə elektrik enerjisi istehlakına məhdudiyyətlərin tətbiq olunduğunu bildirib.

"Şəhər üzrə məhdudiyyətlər tətbiq edilib", deyə o bildirib və sakinləri elektrik şəbəkəsinə düşən yükü azaltmağa çağırıb.

Eyni zamanda Ukraynanın Pilotsuz Sistemlər Qüvvələrinin komandanı Robert Brovdi bildirib ki, Ukrayna pilotsuz uçuş aparatları Sevastopolun əsas elektrik yarımstansiyasına yeddi dəfə zərbə endirib.

Vəziyyət yanacaq təminatına da təsir göstərib. Rusiyanın nəzarətində olan Krım administrasiyası açıqlayıb ki, yanacaq müvəqqəti olaraq yalnız dövlət qurumlarına satılacaq.

Sevastopol sakini jurnalistlərə bildirib ki, əksər yanacaqdoldurma məntəqələrində artıq benzin qalmayıb: "Yanacaqdoldurma məntəqələrində benzin yoxdur, amma ictimai nəqliyyat hələ də işləyir. Mən satış dayandırılmamışdan əvvəl, lakin xeyli baha qiymətə benzin ala bildim".

Sosial şəbəkələrdə yarımada sakinləri tətbiq olunan məhdudiyyətlərdən geniş şəkildə şikayət edirlər. Aleksandr adlı taksi sürücüsü Krımın Rusiyanın təyin etdiyi rəhbəri Sergey Aksyonova müraciət edərək ailəsini necə dolandıracağını soruşub.

"Kreditləri ödəməyə pul olmayacaq. Tezliklə nə yeməyə, nə də ərzaq almağa imkanımız qalmayacaq", deyə o yazıb.

Soyudulmuş quş əti məhsullarının tədarükü ilə məşğul olan sahibkar Diana isə dizel yanacağı olmadan fəaliyyət göstərə bilmədiklərini bildirib.

"Məhsullarımız tez xarab olur. Biz onları yarımadanın müxtəlif yerlərində yerləşən ticarət şəbəkələri və bazarlara çatdırırıq", deyə o qeyd edib.

Digər sakin Olesya isə nəqliyyatın iflic vəziyyətinə düşdüyünü bildirib: "Artıq sərnişin götürməyə yer yoxdur. Hamı işə getməyə çalışır".

Ukraynanın zərbələrinin intensivləşməsi fonunda Rusiyanın təyin etdiyi yerli hakimiyyət bütün uşaq yay düşərgələrinin fəaliyyətini dayandırıb. Sergey Aksyonov onların ən azı sentyabrın 1-dək işləməyəcəyini açıqlayıb.

Yerli sakinlər həmçinin hava həyəcanı siqnallarının və pilotsuz uçuş aparatlarının sayının nəzərəçarpacaq dərəcədə artdığını bildirirlər.

Sevastopol sakinlərindən biri deyib: "Şəhər əvvəlkindən daha təhlükəli olub".

Onun sözlərinə görə, partlayışlar və pilotsuz uçuş aparatlarının vurulması halları artıq daha tez-tez birbaşa şəhər üzərində baş verir.

Məhdudiyyətlərə baxmayaraq, turizm infrastrukturu hələlik fəaliyyətini davam etdirir. Novıy Svet qəsəbəsində yerləşən qonaq evinin sahibi bildirib ki, istirahətçilər gəlməkdə davam edirlər, lakin ümumi ab-hava daha gərginləşib.

"Qonaqlar gəlməyə davam edirlər. Dəniz, çimərliklər, kafelər və turizm infrastrukturu işləyir. Sadəcə, qeyri-müəyyənlik və xəbərlərə maraq artıb", deyə o bildirib.

Bununla yanaşı, sosial şəbəkələrdə Simferopoldan yayılan videolarda demək olar ki, boş küçələr və mağazalar görünür. Videolardan birində müəllif belə deyir: "Burada cəmi bir avtomobil var. Başqa heç nə yoxdur, hər yer boşdur".

Başqa bir videoda isə yerli sakin supermarketdə boş rəfləri göstərərək bunları söyləyir: "Yemək almaq istəyirdik, amma heç nə yox idi. Rəflər tamamilə boşdur".

Son həftələr Ukrayna işğal olunmuş Krımda Rusiyanın hərbi və logistika infrastrukturuna zərbələri intensivləşdirib. Kiyevin qiymətləndirməsinə görə, bu əməliyyatlar Rusiya qoşunlarının təchizatını çətinləşdirməli və Kremli danışıqlara razı olmağa sövq etməlidir.

Ukrayna Prezidenti Volodimir Zelenski bildirib ki, yarımadada həyata keçirilən əməliyyatlar diqqətlə planlaşdırılıb və Rusiyanı sülhü seçməyə məcbur edəcək şərait yaratmaq üçün dəqiq hesablanıb.

Rusiyalı politoloq Tatyana Stanovaya isə hesab edir ki, bu zərbələr Kremlin siyasi mövqeyini dəyişməyəcək: "Bu hücumların nəticəsi yalnız Rusiyada anti-Ukrayna əhval-ruhiyyəsinin daha da güclənməsi olacaq. Onların siyasi dəyişikliklərə gətirib çıxarması ehtimalı azdır".

Onun sözlərinə görə, Ukraynanın bu kampaniyası Rusiya rəhbərliyinə müharibənin davam etdirilməsini ictimaiyyət qarşısında əsaslandırmaq üçün əlavə arqument verir.

Telegramda izləyin