Ölkəmizdə satış rekordları qıran dəriyə qulluq markasının məhsulları xərçəng yaradır?

Azərbaycanda da apteklər və kosmetika mağazalarında geniş satılan CeraVe markası ABŞ-də ciddi hüquqi problemlərlə üzləşib. Markanın sızanaq müalicəsi üçün nəzərdə tutulan bəzi məhsullarının kanserogen təsirə malik benzen qazı əmələ gətirdiyi iddiası ilə şirkətə qarşı altı kollektiv iddia qaldırılıb.

Sonxeber.az xəbər verir ki, məhsulların tərkibində olan benzoil peroksid maddəsi müəyyən temperatur şəraitində parçalanaraq xərçəng riski ilə əlaqələndirilən benzen qazına çevrilə bilər.

Məsələ 2024-cü ilin martında ABŞ-də fəaliyyət göstərən müstəqil Valisure laboratoriyasının hesabatından sonra gündəmə gəlib. Araşdırmada benzoil peroksid tərkibli bəzi akne məhsullarının hətta insan bədəninin normal temperaturunda belə benzen əmələ gətirə biləcəyi bildirilib. Hesabatda CeraVe-nin bəzi məhsullarında da bu riskin müşahidə olunduğu qeyd edilib.

İstehlakçılar sağlamlıqları üçün mümkün təhlükə barədə xəbərdar edilmədiklərini bildirərək şirkətə qarşı məhkəməyə müraciət ediblər. Hazırda işlər ABŞ-nin Nyu-York Cənub Dairə Məhkəməsində araşdırılır.

2026-cı ilin iyun ayına olan məlumata görə, məsələ ilə bağlı hələ yekun məhkəmə qərarı verilməyib.

Hüquqşünaslar vurğulayırlar ki, iddiaların araşdırılması davam edir və bu, hələlik CeraVe və onun sahibi L'Oréal şirkətinin hüquqi baxımdan təqsirli bilinməsi demək deyil.

Telegramda izləyin