"Geniş istifadəçi kütləsini birləşdirən rəqəmsal məktəb platformaları təhsil idarəçiliyində şəffaflığı təmin edir" - Deputat

Prezident İlham Əliyevin "Azərbaycan Respublikasında rəqəmsal inkişafın sürətləndirilməsinə dair 2026-2028-ci illər üçün Fəaliyyət Planı"nın təsdiq edilməsi ilə bağlı imzaladığı Sərəncam, habelə Azərbaycan Respublikasının Birinci vitse-prezidenti Mehriban Əliyevanın sədrliyi ilə Şuranın ilk iclasının keçirilməsi rəqəmsal transformasiya prosesinin dövlətin ali idarəetmə platformasında vahid koordinasiya ilə idarə olunduğunu bir daha sübut etdi".

Bunu Sonxeber.az-a açıqlamasinda Müşfiq Cəfərov bildirib.

Deputat qeyd edib ki, Azərbaycanın təhsil sisteminin bu gün tamamilə rəqəmsal infrastruktur üzərində yenidən qurulması, ölkənin bütün təhsil müəssisələrinin vahid təhlükəsiz internet şəbəkəsi ilə təmin olunması, məktəblərin texniki təchizatının yaxşılaşdırılması və kompüter təminatı mütənasibliyinin əhəmiyyətli dərəcədə optimallaşdırılması ölkəmizdə bu istiqamətdə güclü siyasi iradənin olduğunu göstərir:

"Habelə geniş istifadəçi kütləsini birləşdirən rəqəmsal məktəb platformaları təhsil idarəçiliyində şəffaflığı təmin edir və coğrafi əhatə dairəsini regionlar üzrə genişləndirir. Attestat, diplom və sertifikatların elektron formata keçirilməsi isə sənəd dövriyyəsini sürətləndirməklə, həm də saxtalaşdırma riskini sıfıra endirir. Birinci vitse-prezident Mehriban xanım Əliyevanın rəhbərliyi altında gələcəyin rəqəmsal cəmiyyətinin qurulmasında şagirdlərin müasir texnoloji vərdişlərə yiyələnməsini təmin edən milli layihələr və "STEAM" metodologiyası strateji rol oynayır. Həmçinin son illərdə ali məktəblərdə İT ixtisaslarına qəbulun bir neçə dəfə artması ölkədə güclü texnoloji elitanın formalaşdığını sübut edir. Növbəti mərhələdə isə süni intellekt əsaslı fərdiləşdirilmiş öyrənmə metodologiyalarının və analitik alətlərin tətbiqi texnologiyanı, sadəcə, idarəetmədə deyil, birbaşa tədris prosesinin keyfiyyətində yeni standart layihəsinə çevirəcəkdir".

Deputat vurğulayıb ki, ölkənin bütün təhsil müəssisələri vahid təhlükəsiz internet şəbəkəsi ilə təmin edilib. Son beş il ərzində məktəblərə 235 mindən çox kompüter paylanılıb:

"Bir kompüterə düşən şagird sayı 32:1-dən 6:1-ə endirilib. Təhsil müəssisələrində internet trafiki 4,7 dəfə artaraq saniyədə 47 Gbit-ə çatdırılıb. 900 mindən çox istifadəçini əhatə edən platforma şagirdləri, müəllimləri, məktəb rəhbərliyini və valideynləri vahid mühitdə birləşdirir. Hazırda Bakıda 354 məktəbi əhatə edir; 2026-2027-ci tədris ilindən 400-dən çox region məktəbinə genişləndiriləcək.Bütün təhsil pillələri üzrə məlumatlar tam rəqəmsallaşdırılıb. Vətəndaşlara 62 elektron xidmət onlayn təqdim olunur; bunların 8-i "mygov" platformasına inteqrasiya edilib və hər il 320 mindən çox vətəndaş tərəfindən istifadə olunur.

Attestat, diplom və sertifikatların elektron formatda verilməsinə başlanılıb. Bu addım sənəd əldəetməni sürətləndirir, kağız dövriyyəsini azaldır, saxtalaşdırma risklərini minimuma endirir və beynəlxalq yoxlamanı asanlaşdırır.Məktəblərdə "Rəqəmsal bacarıqlar" (500 min+ şagird) və "STEAM Azərbaycan" (300 min+ şagird) layihələri həyata keçirilir. 2015-2025-ci illər ərzində ali təhsil müəssisələrində İT ixtisaslarına qəbul 5 dəfə artıb. Növbəti mərhələdə süni intellekt əsasında fərdiləşdirilmiş öyrənmə, müəllimlərin inzibati yükünün azaldılması və şagird nailiyyətlərinin məlumatlara əsaslanan təhlili nəzərdə tutulur. Məqsəd texnologiyanı yalnız idarəetmədə deyil, birbaşa tədris prosesində tətbiq edərək təhsilin keyfiyyətini yüksəltməkdi".

Telegramda izləyin