Qurban bayramında qonaqlıq üstündə həyat yoldaşını döydü - 1200 manat cərimələndi

Ailə-məişət münaqişəsi zəminində həyat yoldaşına yüngül bədən xəsarəti yetirməkdə təqsirləndirilən şəxs barəsində məhkəmə hökmü elan edib.

Qaynarinfo xəbər verir ki, məhkəmə materiallarına əsasən, hadisə 2026-cı ilin iyun ayında, Qurban bayramı ərəfəsində ailənin yaşadığı evdə baş verib.

Bildirilir ki, həyat yoldaşlarının bayram münasibətilə Sumqayıt şəhərində yaşayan qadının bacısının evinə qonaq getməsi ilə bağlı fikir ayrılığı yaranıb. Mübahisə zamanı kişi həyat yoldaşının hər iki qoluna, döş qəfəsinə və sol ayaq nahiyəsinə zərbələr endirib.

Nəticədə zərərçəkmiş qadına sol baldırın aşağı hissəsində dərialtı hematoma, döş qəfəsi, hər iki bazu və sol dirsək nahiyəsində qançırlar formasında, sağlamlığın qısa müddətə pozulmasına səbəb olan yüngül bədən xəsarətləri yetirildiyi müəyyən edilib.

Təqsirləndirilən şəxs məhkəmə iclasında özünü təqsirli bildiyini, hadisədən peşman olduğunu və həyat yoldaşı ilə barışdıqlarını deyib. Onun sözlərinə görə, mübahisədən sonra zərərçəkmiş şəxs Daxili İşlər Nazirliyinin (DİN) "102" Xidmətinə müraciət edib.

Zərərçəkmiş qadın da məhkəmədə ifadə verərək həyat yoldaşı ilə barışdığını, ona qarşı şikayət və tələbinin olmadığını bildirib.

Məhkəmə toplanmış sübutları araşdıraraq təqsirləndirilən şəxsi Cinayət Məcəlləsinin 128-ci maddəsi (qəsdən sağlamlığa yüngül zərər vurma) ilə təqsirli bilib və ona 1200 manat məbləğində cərimə cəzası təyin edib.

Telegramda izləyin