"Uşaqlarda erkən yaşlardan sosial şəbəkələrdən asılılığın formalaşması diqqət və ünsiyyət problemlərinin yaranmasına səbəb olur" - Deputat

"16 yaşdan aşağı uşaqların sosial şəbəkələrdə hesab açmasına dair qaydaların tətbiqi hüquq və qanuni mənafelərinin müdafiəsinə yönəlmiş addım olmaqla yanaşı həm də təhlükəsiz rəqəmsal mühitdə inkişafının təmin edilməsi kimi də qiymətləndirmək olar".

Bunu Sonxeber.az-a danışan Milli Məclisin deputatı, Ana Vətən Partiyasının sədri Günay Ağamalı deyib.

Deputat qeyd edib ki, sosial media platformaları uşaqlara geniş informasiya və ünsiyyət imkanları təqdim etsə də, erkən yaşlarda nəzarətsiz şəkildə bu platformalardan istifadə etməsi onların psixoloji sağlamlığı üçün müəyyən risklər yaradır:

"Belə ki, kibertəqib, onlayn zorakılıq, şəxsi məlumatların qanunsuz istifadəsi, yaşa uyğun olmayan məlumatlar uşaqların düzgün psixoloji inkişafına maneə ola bilər. Ən önəmlisi isə müxtəlif manipulyativ və destruktiv çağırışlar uşaqların fiziki, psixoloji və mənəvi inkişafı üçün ciddi təhlükə mənbəyidir. Bu baxımdan qanunvericiliyə edilən dəyişiklik uşaqların informasiya təhlükəsizliyinin gücləndirilməsinə, onların psixoloji sağlamlığının qorunmasına və sağlam inkişaf mühitinin təmin edilməsinə istiqamətində atılan mühüm addımdır. Uşaqlarda erkən yaşlardan sosial şəbəkələrdən asılılığın formalaşması onlarda diqqət və ünsiyyət problemlərinin yaranmasına səbəb ola bilər. Ümumiyyətlə bu gün rəqəmsal asılılıq tək uşaqları deyil yetgin insanları da real sosial münasibətlərdən uzaqlaşdırır.

Bu gün rəqəmsal asılılıq ailədaxili münasibətlərə də təsir göstərərək valideyn-övlad ünsiyyətinə mənfi təsir edir. Uşaqlara sosial şəbəkələrdən istifadəyə qoyulan məhdudiyyət valideyn nəzarətinin gücləndirilməklə yanaşı həm də gələcəyimizin olan uşaqların ailə dəyərləri əsasında formalaşmasına, onlarda təhsil, idman və digər sosial fəaliyyətlərə olan marağı daha da artıracaq. Sağlam və güclü cəmiyyətin formalaşması üçün bu addım mütləq idi. Çünki erkən yaşlarda uşaqların rəqəmsal təsirlərə məruz qalması cəmiyyətin mənəvi mühitinə və dəyərlər sisteminə də mənfi təsir göstərir".

"Deputat vurğulayıb ki, sosial şəbəkələr vasitəsilə yayılan zorakılıq, aqressiya və digər mənfi tendensiyalar uşaqların davranışına birbaşa təsir göstərir:

Bu gün dövlət siyasətinin prioritet istiqamətlərindən biri də uşaqların təhlükəsizliyinin və rifahının təmin edilməsidir. Rəqəmsal mühitdə uşaqların müdafiəsinin gücləndirilməsi, onların hərtərəfli inkişafı üçün təhlükəsiz şəraitin yaradılması dövlət siyasətinin əsas prioritet istiqamətlərindəndir. Ona görə də 16 yaşdan aşağı şəxslərin sosial şəbəkələrdə hesab açmasının məhdudlaşdırılmasını uşaqların hüquqlarının müdafiəsinə və rəqəmsal risklərdən qorunmasına yönəlmiş addım kimi qiymətləndirrəm".

Telegramda izləyin