Uşaq pulu yenidən bərpa ediləcəkmi? - AÇIQLAMA

Bu gün insanların ən çox müzakirə etdiyi məsələ uşaq pulunun nə zaman yenidən bərpa ediləcəyidir. Bu məsələ Milli Məclisdə də dəfələrlə müzakirə olunub və hətta bəzi deputatlar uşaq pulunun bərpası ilə bağlı öz təkliflərini mediada səsləndiriblər. Ümumiyyətlə yaxın vaxtlarda uşaq pulu yenidən bərpa ediləcəkmi?

Bununla bağlı Sonxeber.az-a danışan deputat Cavanşir Paşazadə bildirib ki, bu məsələ Milli Məclisdə dəfələrlə müzakirə olunub və həmkarları bununla bağlı fikirlər irəli sürüblər:

"Bu məsələ qərar vermək bizim öhdəliyimizdə deyil. Bununla bağlı müvafiq dövlət orqanları hesablamalar aparmalı və mümkün variantları araşdırmalıdır. Əlbəttə hər birimiz istərdik ki, uşaq pulu yenidən bərpa olunsun. Bilirsiniz ki, bu gün aztəminatlı ailələr sosial yardım alırlar. Məlumat üçün qeyd etmək istəyirəm ki, hazırda ölkədə 10-dan çox sosial müavinət növü var. Onların hər biri də məhz uşaqların sosial müdafiəsinə yönəlib. Belə ki, sağlamlıq imkanları məhdud 18 yaşadək uşaqlar, şəhid ailələrinin və müharibə əlillərinin, beşdən çox uşağı olan qadınların, müddətli həqiqi hərbi xidmət qulluqçularının uşaqları, valideyn himayəsindən məhrum olmuş uşaqlar aylıq sosial müavinətlə təmin edilirlər. Həmçinin aztəminatlı (ünvanlı dövlət sosial yardımı alan) ailələrin 1 yaşadək uşaqlarına aylıq sosial müavinət, yeni doğulan uşaqlara görə isə birdəfəlik müavinət ödənilir.

Eləcə də Çernobıl AES qəzası nəticəsində I və II qrup əlil olmuş, yaxud vəfat etmiş valideynlərin uşaqlarına, habelə Çernobıl qəzası nəticələrinin aradan qaldırılması iştirakçılarının dispanser qeydiyyatında olan uşaqlarına da müavinət verilir. Ailə başçısını itirmiş ailələrə də aylıq sosial müavinət və ya əmək pensiyası ödənilir ki, həmin ailələrin üzvlərinin böyük əksəriyyətini, habelə ünvanlı sosial yardım alan ailələrin üzvlərinin 50 faizdən çoxunu uşaqlar təşkil edir. Valideynlərini itirmiş və valideyn himayəsindən məhrum olmuş uşaqların qəyyumları (himayəçiləri) aylıq sosial müavinətlə təmin edilirlər. Sığortaolunanlara da üç yaşınadək uşaqlara qulluğa görə müavinət ödənilir. Qeyd etdiyim bu müavinətlər mütəmadi olaraq artırılır".

Deputat vurğulayıb ki, uşaqlar üçün verilən müavinətin bərpası hələlik gündəmdə deyil:

"Bilirsiniz ki, Azərbaycanda 2000-ci illərin əvvəllərində "uşaq pulu" şəklində verilməsi həyata keçirilirdi. Lakin sonradan uşağı olmayan ailələrin, eləcə də aztəminatlı ailələrin də sosial müdafiəsini də dövlət öz üzərinə götürməsi, onlara da müavinətlər verilməsi təklif olundu. Ona görə də dövlət tərəfindən ünvanlı sosial yardım prinsipinə üstünlük verildi. Qaldı ki, uşaq pulunun bərpası məsələsinə düşünürəm bu məsələ ilə müvafiq orqanlar tərəfindən mümkün variantlar araşdırıla bilər".

Telegramda izləyin