"Bu gün Azərbaycanla ABŞ arasındakı bütün sahələrdəki əməkdaşlıq yüksək səviyyədədir" - DEPUTAT

"Bu gün Azərbaycan-ABŞ dostluq və əməkdaşlıq münasibətləri yüksək səviyyədədir".

Bunu Sonxeber.az-a danışan deputat Asim Mollazadə bildirib.

Deputat qeyd edib ki, son illərdə Azərbaycanla ABŞ arasında münasibətlər keyfiyyətcə yeni mərhələyə qədəm qoyub:

"Bütün sahələrdə ölkələr arasında əməkdaşlıq yüksək səviyyədədir. Azərbaycanın müstəqil xarici siyasət kursu, regional liderlik statusu və xüsusilə postmünaqişə dövründə ortaya qoyduğu sülhpərvər mövqe bir çox ölkələr tərəfindən alqışlanır. Cənubi Qafqazda sülhün təmin olunması Tramp administrasiyasının xüsusi diqqət mərkəzindədir. Ötən ilin avqustunda imzalanan Vaşinqton razılaşması bunu bir daha sübut edir. Rəsmi Vaşinqton Azərbaycanın regionda rolunu və təşəbbüslərini yüksək dəyərləndirir. Cənab prezident İlham Əliyevin ABŞ-a tarixi səfəri zamanı Ağ Evin rəmzi açarının dövlətimizin başçısına təqdim edilməsi və "Azadlığa Dəstək Aktı"na edilən ədalətsiz 907-ci düzəlişdən Azərbaycan Prezidentinin iştirakı ilə oval ofisdə imtina edilməsi iki ölkə arasında münasibətlərin bundan sonra da yüksək səviyyədə olacağından xəbər verir. Hazırda Azərbaycanın gözləntisi ABŞ Konqresinin ədalətsiz 907-ci düzəlişi tamamilə aradan qaldırması ilə əlaqədardır. Bilirsiniz ki, 1992-ci ilin oktyabrında qəbul edilən 907-ci düzəliş guya Azərbaycanın Ermənistanı blokadaya salmasına görə idi. Ancaq həmin dövrdə Ermənistan deyil, bu ölkənin yürütdüyü işğal siyasəti nəticəsində Naxçıvan Muxtar Respublikası blokada altına düşmüşdü. Ümid edirik ki, sülh müqaviləsi imzalandıqdan sonra bu düzəliş tamamilə aradan qaldırılacaqdır".

Deputat vurğulayıb ki, Azərbaycan ilə ABŞ arasında münasibətlər qarşılıqlı maraqlar və təhlükəsizlik təməlində inkişaf edir:

"İki ölkə arasında əlaqələr enerji təhlükəsizliyi və regional sabitlik başda olmaqla bir çox istiqamət üzrə fəal genişləndirilir. Bu istiqamətdə Amerika Birləşmiş Ştatlar və Prezident Donald Trampın regionumuzda sülhün və sabitliyin dəstəklənməsindəki rolunu xüsusi qeyd etmək lazımdır. Çünki Vaşinqtonda sülh sazişinin paraflanması və üçtərəfli Birgə Bəyannamənin imzalanmasının regionda sülh və sabitliyin bərpa olunması baxımından mühüm əhəmiyyət kəsb edir. Xüsusilə də Donald Trampın ikinci dəfə ABŞ Prezidenti seçilməsindən sonra iki ölkə arasında əməkdaşlıq və qarşılıqlı etimada əsaslanan imünasibətlər uğurla inkişaf edir".

Telegramda izləyin