Kommunal xidmətlər şəhid və qazi ailələri üçün pulsuz ola bilər? - AÇIQLAMA

Şəhid və qazi ailələrinin sosial vəziyyətinin yaxşılaşdırılması Azərbaycan dövlətinin sosial siyasətinin əsas prioritetidir. Bu təbəqədən olan vətəndaşların həyat şəraitinin yüksəldilməsi və problemlərinin həlli istiqamətində kompleks tədbirlər planlı şəkildə həyata keçirilir.Şəhid ailələrinin və müharibə əlillərinin mənzillər və fərdi evlərlə təmin edilməsi istiqamətində genişmiqyaslı dövlət proqramları icra edilir.Qazilərin və şəhid ailəsi üzvlərinin əmək bazarına inteqrasiyası, kiçik ailə təsərrüfatlarının qurulması (özünüməşğulluq proqramları) üçün aktiv tədbirlər görülür.Müharibə iştirakçılarına yönələn müxtəlif sosial ödənişlər, təqaüdlər təyin edilir və reabilitasiya mərkəzlərində bərpaedici müalicələr təşkil olunur. Bu gün təklif olunan məsələlərdən biri də şəhid və qazi ailələrinin kommunal xidmətdən pulsuz yararlanmasıdır. Kommunal xidmətlər şəhid və qazi ailələri üçün pulsuz ola bilərmi?

Bununla bağlı Sonxeber.az-a danışan deputat Aydın Hüseynov bildirib ki, əldə etdiyimiz möhtəşəm zəfərləri xalq və dövlət olaraq Ali Baş Komandana, hərbiçilərimizə və qazilərimizə borcluyuq:

"Məhz buna görə də şəhid ailələri və qazilərimizə dövlət tərəfindən xüsusi qayğı göstərilir. Bilirsiniz ki, hər şəhidə görə ailəyə aylıq 700 manat məbləğində Prezident təqaüdü ödənilir. Şəhid və qazi ailələrinin sosial müdafiəsi, mənzil-məişət şəraitinin yaxşılaşdırılması, tibbi reabilitasiyası və məşğulluğunun təmin edilməsi istiqamətində Əmək və Əhalinin Sosial Müdafiəsi Nazirliyi tərəfindən geniş dəstək proqramları həyata keçirilir. Bunlarla yanaşı kommunal xidmətlərin pulsuz olması da o ailələr üçün dəstəkdir. Ona görə hesab edirəm ki, bu məsələnin gündəmə gətirilib, müzakirə olunması mümkündür. Müvafiq orqanlar bununla bağlı bütün mümkün variantlar barədə araşdırma aparmalı və təkliflərini irəli sürə bilərlər. Artıq, bu ilin büdcəsi artıq təsdiqlənib. Amma gələn ilin büdcəsinin qəbulu zamanı bu məsələyə baxıla bilər. Keçmiş məcburi köçkünlər mərhələli şəkildə öz doğma yurdlarına qayıdırlar. Onlar üçün də müəyyən imtiyazlar var idi. Bu imtiyazlar onlar tam doğma yurdlarına qayıtdıqdan sonra ləğv ediləcək. Bundan sonra da şəhid və qazi ailələrimiz üçün kommunal xidmətlərin pulsuz olması məsələsinə baxıla bilər".

Telegramda izləyin