"Rusiya tərəfi təqdim olunan notaya ciddi yanaşmalı və obyektiv araşdırma aparmalıdır" - Bəhruz Quliyev

"Azərbaycanın Rusiya Federasiyasının ölkəmizdəki səfirini Xarici İşlər Nazirliyinə çağıraraq nota təqdim etməsi dövlətlərarası münasibətlərdə ciddi diplomatik addımdır və rəsmi Bakının baş verən hadisələrə prinsipial yanaşmasının göstəricisidir. Əgər Ukrayna ərazisində SOCAR-a məxsus mülki enerji obyektləri ardıcıl şəkildə zərbələrə məruz qalırsa və bu hallar təkrarlanırsa, Azərbaycan tərəfinin bununla bağlı izahat tələb etməsi tamamilə beynəlxalq hüquqa və diplomatik praktikaya uyğundur.

Burada diqqət çəkən əsas məqam ondan ibarətdir ki, söhbət yalnız iqtisadi maraqlardan deyil, Azərbaycanın dövlət və milli maraqlarından gedir. SOCAR Azərbaycanın strateji şirkətidir və onun xaricdəki obyektlərinə qarşı hər hansı hücum ölkəmizin iqtisadi maraqlarına birbaşa təsir göstərir. Eyni zamanda Kiyevdəki səfirliyimizin və Xarkovdakı fəxri konsulluğumuzun zərər görməsi diplomatik nümayəndəliklərin toxunulmazlığı ilə bağlı beynəlxalq hüquq normalarını gündəmə gətirir."

Bu fikirləri Sonxeber.az-a danışan Səs qəzetinin baş redaktoru, siyasi ekspert Bəhruz Quliyev deyib.

Ekspert qeyd edib ki, Azərbaycan indiyədək Rusiya-Ukrayna müharibəsində balanslaşdırılmış və beynəlxalq hüquqa söykənən mövqe nümayiş etdirib:

"Buna baxmayaraq, Azərbaycanın mülki obyektləri və diplomatik nümayəndəlikləri zərər görürsə, rəsmi Bakının buna etiraz etməsi təbii və zəruridir. Bu, emosional deyil, hüquqi və siyasi baxımdan əsaslandırılmış mövqedir".

"Hesab edirəm ki, Rusiya tərəfinin təqdim olunan nota ciddi yanaşması, obyektiv araşdırma aparması və Azərbaycanın qaldırdığı məsələlərə aydın izahat verməsi iki ölkə arasında münasibətlərdə etimadın qorunması baxımından mühüm əhəmiyyət daşıyır. Əks halda, bu cür hadisələrin təkrarlanması münasibətlərdə əlavə gərginlik yarada və qarşılıqlı etimada mənfi təsir göstərə bilər.

Azərbaycan hər zaman qarşılıqlı hörmətə, suverenliyə və beynəlxalq hüququn prinsiplərinə əsaslanan münasibətlərin tərəfdarı olub. Məhz buna görə də rəsmi Bakının diplomatik kanallar vasitəsilə öz etirazını ifadə etməsi həm dövlət məsuliyyətinin, həm də milli maraqların qətiyyətlə müdafiəsinin nümunəsi kimi qiymətləndirilməlidir."- deyə, B.Quliyev əlavə edib.

Telegramda izləyin