"Azərbaycan-ABŞ arasındakı dostluq münasibətləri və hər bir sahədəki əməkdaşlıq yüksələn uğurla inkişaf edir" - DEPUTAT

"Son dövrlər Azərbaycan-ABŞ arasındakı dostluq münasibətləri və hər bir sahədəki əməkdaşlıq yüksələn uğurla inkişaf edir".

Bunu Sonxeber.az-a danışan Vüqar İskəndərov bildirib.

Deputat qeyd edib ki, bu gün Azərbaycan-ABŞ münasibətləri yeni mərhələyə qədəm qoyub:

"Azərbaycan ABŞ ilə əməkdaşlığın inkişafına böyük əhəmiyyət verir. Strateji Tərəfdaşlıq haqqında Xartiyanın imzalanması isə ikitərəfli münasibətlərin inkişafında tarixi mərhələ hesab olunur.Azərbaycan Prezidenti İlham Əliyevin ABŞ lideri Donald Trampın dəvəti ilə ötən ilin avqustunda ABŞ-na səfəri iki ölkə arasındakı münasibətlərdə yeni mərhələnin əsasını qoyub. 2025-ci il avqustun 8-də Azərbaycan və Ermənistan arasında sülh sazişinin paraflanması məhz Vaşinqtonda baş tutdu. Bu, Cənubi Qafqazda uzun illər davam edən münaqişədən sonra regional sabitlik istiqamətində atılan ən mühüm diplomatik addımlardan biri idi. Bu hadisə yalnız Bakı ilə İrəvan arasında münasibətlərin normallaşdırmadı, həm də Azərbaycan-ABŞ əlaqələrinə yeni məzmun qazandırdı. Bu addım Azərbaycanın irəli sürdüyü sülh gündəliyinin beynəlxalq platformada növbəti mərhələyə keçdiyini göstərdi"

Deputat vurğulayıb ki, cənab prezident İlham Əliyevin ABŞ-a tarixi səfəri zamanı Ağ Evin rəmzi açarının dövlətimizin başçısına təqdim edilməsi və "Azadlığa Dəstək Aktı"na edilən ədalətsiz 907-ci düzəlişdən Azərbaycan Prezidentinin iştirakı ilə oval ofisdə imtina edilməsi iki ölkə arasında münasibətlərin bundan sonra da yüksək səviyyədə olacağından xəbər verir:

"Hazırda Azərbaycan ilə ABŞ arasında əməkdaşlıq bir neçə əsas istiqamətdə davam edir. Bu gün hər iki ölkə üçün enerji, iqtisadiyyat, təhlükəsizlik və regional sabitlik sahələrində əməkdaşlığa xüsusi önəm verir. İki ölkə regional təhlükəsizlik, sülh prosesi və beynəlxalq təşkilatlar çərçivəsində əməkdaşlıq edir.ABŞ Azərbaycanın mühüm ticarət və investisiya tərəfdaşlarından biridir. ABŞ sərmayəli yüzlərlə şirkət Azərbaycanda fəaliyyət göstərir.2026-cı ilin fevralında imzalanan Azərbaycan və ABŞ arasında Strateji Tərəfdaşlıq Xartiyası iki ölkə arasında siyasi, iqtisadi və təhlükəsizlik sahələrində əməkdaşlığın daha da genişləndirilməsinə kömək etdi. İki ölkə liderləri arasında dostluq münasibətləri bundan sonra da Azərbaycan-ABŞ arasındaki bütün sahələr üzrə olan əməkdaşlığın daha inkişaf edəcəyindən xəbər verir".

Telegramda izləyin