Qərbi Azərbaycanlıların qaçqınlıq statusu yenidən bərpa oluna bilərmi? - AÇIQLAMA

Bu gün təklif olunan məsələlərdən biri qərbi azərbaycanlılara 2005-ci ildən əvvəl mövcud olmuş kommunal güzəştlərin və ya keçmiş qaçqın statusunun bərpasıdır. Ümumiyyətlə, qərbi azərbaycanlılara yenidən qaçqınlıq statusu verilə bilərmi?

Bununla bağlı Sonxeber.az-a danışan deputat Aydın Hüseynov bildirib ki, qərbi azərbaycanlıların qayıdışı öz doğma torpaqlarına qayıdışı bu gün müzakirə edilən əsas humanitar və siyasi mövzulardan biridir:

"Tələbimiz isə aydındır. Vaxtilə indiki Ermənistan ərazisindən deportasiya olunmuş azərbaycanlıların təhlükəsiz, ləyaqətli və sülh yolu ilə öz doğma yurdlarına qayıdışın beynəlxalq hüquq çərçivəsində təmin edilməsidir. Sülh sazişindən sonra bu qayıdış mərhələli şəkildə həyata keçirilə bilər. Əgər Azərbaycan və Ermənistan arasında yekun sülh sazişi imzalansa və təhlükəsizlik təminatları yaradılarsa, qayıdış hüququ ilə bağlı danışıqların başlanması mümkün ola bilər. Azərbaycan bu məsələnin beynəlxalq hüquq və insan hüquqları çərçivəsində həllini müdafiə edir. Qərbi azərbaycanlıların qayıdışın təhlükəsiz, könüllü və ləyaqətli şəkildə həyata keçirilməlidir".

Deputat vurğulayıb ki, 2005-ci ilə qədər qüvvədə olmuş bəzi kommunal güzəştlərin və sosial təminatların Qərbi azərbaycanlılara əvvəlki qaydada yenidən verilməsi ilə bağlı müxtəlif təkliflər səsləndirilsə də, hazırda bununla bağlı rəsmi qərar yoxdur:

"Bu məsələ Milli Məclisdə də dəfələrlə müzakirə olunub. Bilirsiniz ki, Milli Məclisdə və ictimai müzakirələrdə Qərbi azərbaycanlıların sosial müdafiəsinin gücləndirilməsi, onlara əlavə dəstək mexanizmlərinin yaradılması barədə fikirlər irəli sürülüb. Amma bu gün müzakirə edilən əsas məsələ onların hüquqlarının bərpası və tarixi yurdlarına təhlükəsiz qayıdış hüququnun təmin edilməsinə yönəlib. Düşünürəm ki, gələcəkdə 2005-ci ildən əvvəl mövcud olmuş kommunal güzəştlərin və ya keçmiş qaçqın statusunun bərpa edilməsi məsələsi müzakirə oluna bilər".

Telegramda izləyin