"Sosial şəbəkələrdən çox istifadə uşaqlarda fiziki, psixoloji və sosial problemlərə səbəb olur" - Sosioloq

"Sosial şəbəkələrdən həddindən artıq istifadə uşaqlarda bir sıra fiziki, psixoloji və sosial problemlərə səbəb olur. Ona görə də 16 yaşa qədər uşaqlara sosial şəbəkələrdə qeydiyyatına məhdudiyyət qoyulması qərarını alqışlayıram".

Bunu Sonxeber.az-a danışsan sosioloq Nəzrin Əhmədzadə bildirib.

Sosioloq bildirib ki, sosial şəbəkələrdən həddindən artıq çox istifadə uşaqlarda diqqətin yayınması və öyrənmə kimi problemləri ortaya çıxarır. Yeni uşaqda dərsə maraq azalır, diqqəti uzun müddət cəmləmək çətinləşir. Digər problem isə yuxu pozuntularıdır. Gec saatlara qədər telefondan istifadə yuxu keyfiyyətini pisləşdirir, bu da yorğunluq və məktəbdə zəif nəticələrə səbəb ola bilər. Eləcə də sosial şəbəkələrdən çox istifadə narahatlıq, depressiya, özünəinamın azalması və stress kimi psixoloji problemlər yaradır".

Sosioloq vurğulayıb ki, sosial şəbəkələrdə uşaqların kiberzorakılığa da məruz qalması ehtimalı böyükdür:

"Uşaqlar təhqir, təhdid və ya onlayn təzyiqlə qarşılaşa bilərlər ki, bu da onların emosional vəziyyətinə mənfi təsir göstərir. Həddindən çox asılılıq sosial şəbəkələrdən uzaq qalmaqda çətinlik, digər fəaliyyətlərə marağın azalması yaradır. Sosial şəbəkələrdən çox istifadə psixoloji ilə yanaşı fiziki sağlamlığa da mənfi təsir göstərir. Uzun müddət ekrana baxmaq göz yorğunluğu, boyun və bel ağrıları, həmçinin az hərəkətlilik səbəbindən artıq çəki riskini artırır. Ən mühüm olan isə uşaqların sosial bacarıqların zəifləməsidir. Uşaqlar sosial şəbəkələrdə uzun müddət vaxt keçirməsi onlarda real ünsiyyət və dostluq münasibətlərinə ayrılan vaxtı minimuma endirir.

Ən təhlükəsli məqam isə sosial şəbəkələrdəki yaşa uyğun olmayan zorakılıq, saxta məlumatlar və ya zərərli məzmunlu informasiyalar uşaqların inkişafına mənfi təsir göstərə bilər.Bu riskləri azaltmaq üçün 16 yaşa qədər uşaqlara sosial şəbəkələrdə qeydiyyatına məhdudiyyət qoyulması doğru qərardır. Bu qanun uşaqların boş vaxtlarını idman, kitab oxumaq kimi alternativ fəaliyyətlərlə əvəz etməsinə kömək edəcək".

Telegramda izləyin