"Azərbaycan yaşıl enerji sahəsində etibarlı tərəfdaş kimi mövqeyini günbəgün daha da möhkəmləndirir" - DEPUTAT

"Azərbaycan yaşıl enerji sahəsində etibarlı tərəfdaş kimi mövqeyini günbəgün daha da möhkəmləndirir".

Bunu Sonxeber.az-a danışan deputat Azər Məmmədov bildirib.

Deputat qeyd edib ki, cənab prezident İlham Əliyevin bütün sahələrdə apardığı uğurlu siyasət sayəsində ölkəmiz yaşıl enerjinin istehsalı, ötürülməsi və ixracı sahəsində etibarlı tərəfdaş kimi mövqeyini möhkəmləndirmək də davam edir:

"Bu gün ölkə başçısının alternativ və bərpa olunan enerji mənbələrinin inkişafı, "yaşıl enerji"yə keçidin təmin edilməsi istiqamətində həyata keçirilən layihələr 1994-cü ildə ulu öndər Heydər Əliyev tərəfindən təməli qoyulan enerji siyasətinin davamıdır. Azərbaycan son illərdə yaşıl enerji sahəsində mühüm addımlar ataraq həm ölkənin enerji təhlükəsizliyinə, həm də qlobal iqlim hədəflərinə töhfə verir. Belə ki, günəş, külək, su və bioenerji kimi bərpa olunan enerji mənbələrinin inkişafına böyük investisiyalar yatırılır.İşğaldan azad olunmuş ərazilərin "Yaşıl Enerji Zonası" elan edilməsi ilə həmin ərazilərdə günəş, külək və su elektrik stansiyalarının tikintisi həyata keçirilir. Xəzər dənizinin zəngin külək enerjisi potensialından istifadə etməklə böyük həcmli enerji layihələri hazırlanır və gələcəkdə Avropaya yaşıl elektrik ixracı hədəflənir. Azərbaycan istixana qazı emissiyalarının azaldılması və enerji istehsalında bərpa olunan mənbələrin payının artırılması istiqamətində beynəlxalq öhdəliklər götürüb.Ən önəmlisi isə COP29-a kimi mötəbər beynəlxalq tədbirə ev sahibliyi etməsi Azərbaycanın yaşıl enerji və iqlim siyasətində beynəlxalq rolunu daha da gücləndirdi. Sadaladığım bu tədbirlər Azərbaycanın iqtisadiyyatının şaxələndirilməsinə, ekoloji mühitin qorunmasına və gələcək nəsillər üçün dayanıqlı enerji sisteminin qurulmasına xidmət edir".

Deputat vurğulayıb ki, Bakıda keçirilən "Yaşıl Enerjinin İnkişafı və Ötürülməsi Sahəsində Strateji Tərəfdaşlıq Sazişi" çərçivəsində keçirilən 12-ci Nazirlər Görüşü Azərbaycanın yaşıl enerji sahəsində beynəlxalq əməkdaşlığının gücləndirilməsi baxımından mühüm əhəmiyyət daşıyır:

"Bu görüşün məqsədi Xəzər dənizinin bərpa olunan enerji potensialından, xüsusilə dəniz külək enerjisindən birgə istifadə imkanlarını müzakirə etmək, Azərbaycan, Gürcüstan, Rumıniya və Macarıstan arasında yaşıl enerji sahəsində əməkdaşlığı genişləndirmək, Qara dənizin dibi ilə elektrik kabelinin çəkilməsi layihəsinin icra vəziyyətini qiymətləndirmək və növbəti mərhələləri müəyyənləşdirməkdir. "Yaşıl Enerjinin İnkişafı və Ötürülməsi Sahəsində Strateji Tərəfdaşlıq Sazişi" çərçivəsində keçirilən 12-ci Nazirlər Görüşü Azərbaycanın istehsal edəcəyi yaşıl enerjinin Avropa bazarlarına ixracını sürətləndirəməsində, regional enerji təhlükəsizliyini möhkəmləndirmək və təmiz enerji keçidini dəstəkləmək də öz töhfəsini verəcəkdir.

Ümumiyyətlə bu cür mühüm görüşlərə ölkəmizin ev sahibliyi etməsi Azərbaycanın yaşıl enerji sahəsində regional lider mövqeyini gücləndirməsinə, Avropanın enerji təhlükəsizliyinə töhfə verməsinə və ölkənin bərpa olunan enerji potensialının beynəlxalq bazarlara çıxarılmasına yeni imkanlar yaradacaq".

Telegramda izləyin