Azərbaycanda bu şagird və tələbələrə sığorta pulu ödəniləcək

Xəbər verdiyimiz kimi Milli Məclisin plenar iclasında "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" Qanuna təklif edilən dəyişikliklər birinci oxunuşda müzakirə edilərək qəbul olunub. Yeni dəyişikliklər beynəlxalq praktikaya əsaslanmaqla bir sıra mütərəqqi müddəaların qanunvericiliyə gətirilməsini təmin edəcək. Belə ki, qanunvericiliyə edilən dəyişikliyə bəzi şagird və tələbələrə sığorta pulunun ödənilməsi nəzərdə tutulur. Sığorta ödənişi hansı şagird və tələbələrə ediləcək?

Bununla bağlı Sonxeber.az-a danışan deputat Vüqar Bayramov bildirib ki, söhbət istehsalat təcrübəsi (təlimi) keçən şagird və tələbələrdən gedir:

"Milli Məclisdə müzakirə olunan qanun dəyişikliyinə əsasən, istehsalat təcrübəsi zamanı baş verə biləcək bədbəxt hadisələr və peşə xəstəlikləri üzrə həmin şagird və tələbələr icbari sığorta ilə təmin olunacaqlar. Sığorta haqqı təcrübə başlayandan sonra müəyyən edilmiş müddətdə ödəniləcək.Əgər təcrübə zamanı sığorta hadisəsi baş verərsə, qanunvericiliyə uyğun olaraq ödənişlər nəzərdə tutulur. Ödənişlər aylıq, birdəfəlik və ya zəruri hallarda əlavə sığorta ödənişi formasında olacaq. Yəni bu, bütün şagird və tələbələrə verilən aylıq pul deyil, yalnız istehsalat təcrübəsi zamanı baş vermiş sığorta hadisələrinə aid edilən təminatıdır".

Deputat vurğulayıb ki, hazırda qüvvədə olan qanuna əsasən, könüllü fəaliyyətin iştirakçısı olan könüllülərin də istehsalatda bədbəxt hadisələrdən icbari sığortalanması nəzərdə tutulsa da, onlara münasibətdə sığorta haqqının ödənilməsi mexanizmi müəyyən edilməmişdir:

"Yəni, xüsusən də tələbələr təcrübə keçən zaman sığorta hadisəsi baş verdiyi halda onlara sığortanın ödənilməsi mümkün olmur. Ona görə də qanuna dəyişiklik edilməsi vacib idi".

Deputat sığorta ödənişinin istehsalat təcrübəsi keçən tələbə və şagirdlər üçün sığorta haqqı təcrübənin başladığı tarixdən 15 iş günü ərzində rəsmiləşdiriləcəyini qeyd edib.

Telegramda izləyin