Müəllimlərin pensiya yaşı qaldırıla bilərmi? - AÇIQLAMA

Bu gün müzakirə edilən məsələlərdən biri də müəllim və həkimlərin pensiya yaşının artırılmasıdır. Bu məsələ Milli Məclisdə də bir neçə dəfə müzakirə olunub. Həkimlər və müəllimlərin pensiya yaşının artırılması onların sosial durumu üçün faydalı olması ilə yanaşı eyni zamanda paytaxtla yanaşı bölgələrdə də kadr çatışmazlığını aradan qaldıracağı da qeyd edilir.

Bununla bağlı Sonxeber.az-a danışan deputat Ceyhun Məmmədov bildirib ki, pensiya yaşının artırılması və ya azaldılması meselesi cəmiyyətimizdə ən çox müzakirə olunan mövzulardandır:

"İstər həkimlər, istərsə də müəllimlər sağlamlıq imkanları yerində olduğu üçün 65 yaşdan sonra da fəaliyyətlərini davam etdirmək istəyirlər. Bölgələrdə kadr çatışmazlığı olduğu üçün belə bir addımın atılması arzuolunandır. Hesab edirəm ki, bəzi sahələrdə kadr çatışmazlığını aradan qaldırılması üçün mümkün variantlar araşdırıldiqdan sonra bu məsələ müzakirə edilə bilər. Həqiqətən də, bu gün həm həkim, həm də müəllimlərimiz pensiya yaşının müddətinin uzadılmasını arzu edirlər. Bu məsələyə fərdi şəkildə də yanaşmaq da mümkündür. Belə ki, bu məsələyə "yaşın artırılması" kimi deyil də pensiya yaşına çatan, lakin işləmək istəyən və sağlamlıq baxımından işləməyə qadir olan insanların fəaliyyətini davam etdirməsinə imkan yaradılması kontekstində yanaşma məqsədəuyğundur".

Deputat vurğulayıb ki, pensiya yaşı məcburi şəkildə artırılarsa, bu gənc kadrların işə qəbul imkanlarına təsir edəcək:

"Bəzən görürsən ki, gənc pedaqoji və tibb ixtisası üzrə ali məktəbi bitirən gənclər iş tapa bilmirlər. Bu baxımdan, yaşlı kadrların uzunmüddətli saxlanılması gənc mütəxəssislərin motivasiyasına və iş tapmasına mənfi təsir göstərə bilər".

Telegramda izləyin