"Uşaqların sosial şəbəkələrdə qeydiyyatına məhdudiyyət qoyulması uşaqların təhlükəsizliyini artırmaq məqsədi daşıyır" - DEPUTAT

"16 yaşa qədər olan uşaqlara sosial şəbəkələrdə qeydiyyatına məhdudiyyət qoyulması onların həm psixoloji, həm fiziki sağlamlığı üçün atılan mühüm addımdır".

Bunu Sonxeber.az-a danışan deputat Vüqar İskəndərov bildirib.

Deputat qeyd edib ki, 16 yaşdan kiçik uşaqların sosial şəbəkələrdə qeydiyyatına məhdudiyyət qoyulması uşaqların təhlükəsizliyini artırmaq məqsədi daşıyır:

Bu məhdudiyyət uşaqları zərərli və yaşlarına uyğun olmayan məzmundan qoruyur. Kiberzorakılıq və onlayn təzyiq riskini azaldır.Şəxsi məlumatların paylaşılması və dələduzluq hallarının qarşısını almağa kömək edəcək. Sosial şəbəkə asılılığını azaltmağa və uşaqların dərsə, idmana və digər faydalı fəaliyyətlərə daha çox vaxt ayırmasına şərait yaradacaq. Uşaqların psixoloji sağlamlığın və emosional inkişafın qorunmasına dəstək olacaq. Artıq bir çox ölkələrdə 16 yaşa qədər uşaqların sosial şəbəkələrdə qeydiyyatına məhdudiyyət qoyulub. Dünyanın bir çox ölkəsində uşaqların sosial şəbəkələrdən istifadəsi ilə bağlı qanunvericilik sərtləşdirilir"

Deputat vurğulayıb ki, uşaqların sosial şəbəkə asılılığı bir sıra ciddi problemlərə səbəb olur. İlk olaraq sosial şəbəkələrdən asılılıq təhsildə geriləməyə səbəb olur:

"Onlarda dərs oxumağa maraq azalır, diqqət yayınır və akademik nəticələr zəifləyir. Sosial şəbəkələrdən asılılıq uşaqlarda narahatlıq, stress, depressiya, özünəinamın azalması və tənha hiss etmə kimi psixoloji problemlər yaradır. Ən önəmlisi isə uşaqlarda ünsiyyət bacarıqlarının zəifləməsinə səbəb olur. Uşaqlar ailə üzvləri və dostları ilə üzbəüz ünsiyyətdən uzaqlaşırlar. Bundan əlavə sosial şəbəkələrdə uşaqlar kiberzorakılıq, saxta məlumatlar, dələduzluq və şəxsi məlumatların paylaşılması kimi risklərlə qarşılaşa bilərlər. Ona görə 16 yaşa qədər uşaqların sosial şəbəkələrdə qeydiyyatına məhdudiyyət qoyulması mütləqdir. Bu addım uşaqların boş vaxtlarını daha səmərəli istifadə etməsinə kömək edəcək. Onlar boş vaxtlarını daha çox mütaliə etməyə, idman və digər faydalı fəaliyyətlərə sərf edəcəklər. Bu, onların sosiallaşmasını gücləndirməklə yanaşı, telefon, kompüter və internetdən asılılıq riskini də azaldacaq".

Telegramda izləyin