Şöhrət Tağıyevi və şirkəti cərimələndi - Səbəb nədir?

"Qaya Neqliyyat" Məhdud Məsuliyyətli Cəmiyyətinin ((MMC) direktoru Şöhrət Tağıyev cərimələnib.

Qaynarinfo-nun məlumatına görə, "Qaya Neqliyyat" MMC və onun direktoru barəsində İnzibati Xətalar Məcəlləsinin 539.3-cü maddəsi (Dövlət Əmək Müfəttişliyi tərəfindən verilən qanuni əmrlərin və ya tələblərin icra edilməməsi, yaxud müfəttişin fəaliyyətinə maneə törədilməsi) ilə inzibati xəta haqqında protokol tərtib edilib.

Protokol Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən tərtib olunub və işə məhkəmədə baxılıb.

Məhkəmə araşdırması zamanı məlum olub ki, "Qaya Neqliyyat" MMC-də əmək hüquqlarının pozulması ilə bağlı Əmək və Əhalinin Sosial Müdafiəsi Nazirliyinə müraciət daxil olub. Nazirliyin 2026-cı il tarixli məktubunda tarix göstərilməyib, şirkətdən tələb olunan sənədlərin 7 iş günü ərzində tam və düzgün şəkildə təqdim edilməsi istənilsə də, bu tələb yerinə yetirilməyib.

Nazirliyin nümayəndəsi bildirib ki, iş üzrə məhkəmədə tədqiq olunan sübutlar qanunvericiliyin sübutlar və sübutetmə ilə bağlı müddəalarına uyğun olaraq qiymətləndirilib. Sübutların hüquqi qüvvəsini şübhə altına alan hər hansı hal müəyyən edilməyib. Bu səbəbdən "Qaya Neqliyyat" MMC-nin və onun vəzifəli şəxsinin təqsiri tam sübuta yetirilmiş hesab olunub və onların inzibati məsuliyyətə cəlb edilməsi məqsədəuyğun sayılıb.

Məhkəmənin qərarı ilə "Qaya Neqliyyat" MMC İnzibati Xətalar Məcəlləsinin 539.3-cü maddəsində nəzərdə tutulan inzibati xətanı törətməkdə təqsirli bilinərək 2 000 manat məbləğində cərimə olunub.

Şirkətin direktoru Şöhrət Tağıyev də həmin inzibati xətaya görə 1 000 manat məbləğində cərimə edilib.

Telegramda izləyin