"Bu gün Azərbaycan mediasının qarşısında duran əsas məsələlərdən biri sürət və dəqiqlik arasında balansı qorumaqdır" - DEPUTAT

"22 İyul - Milli Mətbuat Günü medianın cəmiyyətdəki rolunu, məsuliyyətini və qarşısında duran çağırışları bir daha dəyərləndirmək üçün mühüm bir gündür. Çünki informasiyanın sürətlə yayıldığı indiki dövrdə insanların ən çox ehtiyac hiss etdiyi məsələ doğru və etibarlı məlumatdır", - bunları Sonxeber.az -a açıqlama verən deputat Aydın Hüseynov deyib:

"Bu gün Azərbaycan mediasının qarşısında duran əsas məsələlərdən biri sürət və dəqiqlik arasında balansı qorumaqdır. Xəbəri ilk vermək vacibdir. Amma bundan da vacibi onu düzgün verməkdir. Sosial şəbəkələrdə təsdiqlənməmiş məlumatlar çox sürətlə yayılır. Belə bir mühitdə peşəkar media yalnız yoxlanılmış faktlara söykənməklə öz nüfuzunu qoruya bilər.
Digər vacib məsələ rəqəmsal dəyişikliklərə uyğunlaşmaqdır. Oxucu artıq xəbəri əsasən telefonundan izləyir. Bu da media qurumlarını yeni texnologiyalardan istifadə etməyə, daha çevik işləməyə məcbur edir. Süni intellekt kimi alətlər də bu prosesdə köməkçi ola bilər. Amma son qərarı yenə jurnalist verməlidir. Çünki məsuliyyət və peşə etikası texnologiya ilə əvəz oluna bilməz.
Media sahəsinin inkişafı üçün jurnalistlərin peşə hazırlığının davamlı gücləndirilməsi, media savadlılığının artırılması və keyfiyyətli jurnalistikanın dəstəklənməsi vacibdir. Güclü media yalnız texniki imkanlarla deyil, peşəkar kadrlar və cəmiyyətin etimadı ilə formalaşır.
Hesab edirəm ki, müasir dövrdə medianın ən böyük kapitalı etimaddır. Oxucu inandığı mənbəyə qayıdır. Bu etimadı qorumağın yolu isə obyektivlikdən, dəqiq məlumatdan və peşə məsuliyyətindən keçir.
Milli Mətbuat Günü münasibətilə bütün jurnalistləri təbrik edir, onlara peşə fəaliyyətlərində uğurlar, obyektiv və məsuliyyətli fəaliyyət arzulayıram".

Telegramda izləyin