Qızılın qiyməti BAHALAŞIR: Bunlara diqqət etmək lazımdır

Qızılın dünya bazarında yüksək səviyyədə qalması və son günlər qiymətin yenidən artması vətəndaşların bu metala marağını artırır. Hazırda qızılın qiymətinə geosiyasi risklər, inflyasiya gözləntiləri, faiz dərəcələri və investor tələbi kimi amillər təsir edir.

Bəs, vətəndaşlar qızıl alarkən əyar, alış-satış fərqi və məhsulun sənədləri baxımından nələrə diqqət etməlidirlər, hazırkı yüksək qiymətlər qızılı investisiya üçün nə dərəcədə cəlbedici edir və qiymətin sonradan enməsi hansı riskləri yarada bilər?
Mövzu ilə bağlı Sonxeber.az-a açıqlama verən iqtisadçı ekspert Xalid Kərimli bildirib ki, bütün investisiyalar üçün risk xarakterikdir. Qızıl nisbətən az riskli investisiya hesab oluna bilər, amma onun da riski var.

"Heç kim deyə bilməz ki, qızılın qiyməti davamlı və hər gün artacaq. Qiymət düşə də bilər. Məsələn, ilin əvvəlindən müəyyən eniş müşahidə olunurdu, son iki-üç həftədə isə artım qeydə alınıb. Qızıla investisiya edən şəxs nəzərə almalıdır ki, qoyduğu vəsait ona faiz və ya dividend gətirməyəcək. Burada qazanc yalnız qızılın qiymətinin artmasından əldə oluna bilər. Həmçinin heç kim qızılı ən ucuz vaxtda alıb, ən baha vaxtda sata bilmir. Bu nöqtələri dəqiq müəyyənləşdirmək mümkün deyil".

Ekspert bildirib ki, ona görə də müəyyən mənada trendi izləmək lazımdır:

"Vətəndaş yığımlarının yalnız bir hissəsini qızıla investisiya edə bilər. Əsas dolanışıq vəsaitini qızıla yatırmaq düzgün yanaşma deyil. Çünki sabah hər hansı öhdəliyi yerinə yetirmək üçün həmin qızılı daha aşağı qiymətə satmaq məcburiyyətində qala bilər. Digər məsələ qızılın hansı formada alınmasıdır. Əgər vətəndaş qızılı investisiya və yığım vasitəsi kimi nəzərdən keçirirsə, zərgərlik məhsullarına deyil, külçə və ya sikkə formasında qızıla, yaxud qızılın qiymətini izləyən qiymətli kağızlara üstünlük verməlidir".

O, vurğulayıb ki, zərgərlik məmulatları yığım vasitəsi hesab olunmur:

"Çünki onların qiymətinə həm hazırlanma xərcləri, həm də digər amillər təsir edir. Bundan əlavə, zərgərlik məmulatını satarkən vətəndaş onu aldığı qiymətə sata bilməyə bilər. Bu baxımdan qızılı investisiya məqsədilə alan şəxslər külçə, sikkə formasında qızıla və ya qızılın qiymətini izləyən qiymətli kağızlara üstünlük verə bilərlər. Amma burada da əsas məqam nəzərə alınmalıdır: investisiyanın hər bir növündə olduğu kimi, qızıla yatırılan vəsaitdə də həm qazanc, həm də itki riski var".

Röyalə Xəyal

Telegramda izləyin