Turistin taksi kabusu! Soyub soğana çevirdilər

İstanbulun Karaköy rayonunda taksiyə minən kanadalı turist Alex Soliman avtomobildə olan iki qadın tərəfindən qarət edildiyini və bıçaqla yaralandığını iddia edib.

Bu barədə Sonxeber.az xarici mediaya istinadla xəbər verir.

Solimanın sözlərinə görə, qadınlar taksinin qapılarını kilidləyərək ondan 6 min 500 lirə pul götürüblər. Turist həmçinin bank kartından terminal cihazı vasitəsilə zorla 3 min 375 lirəlik ödəniş edildiyini bildirib. O, əməliyyatla bağlı bank çıxarışının görüntüsünü əldə edib və banka etiraz edib.

Turistin iddiasına görə, pulunun alınmasına etiraz etdikdən sonra qadınlardan biri bıçaqla onun hər iki qolunu yaralayıb. Soliman taksi sürücüsünün hadisəyə müdaxilə etmədiyini və qadınlarla birlikdə ərazidən uzaqlaşdığını da iddia edib. Hadisənin bir hissəsi mobil telefon kamerası ilə qeydə alınıb.

Hadisədən sonra xəstəxanaya müraciət edən turistin sağ qolunda təxminən 10, sol biləyində isə 2 santimetr uzunluğunda cızıqlar aşkarlanıb. Onun həyati təhlükəsinin olmadığı bildirilib.

Hadisə ilə bağlı araşdırma aparılır.

Telegramda izləyin