Elektron reseptlər nə qədər effektiv olacaq? - AÇIQLAMA

Elektron resept sisteminin tətbiqi dərmanların təyinatı və istifadəsinə nəzarətin gücləndirilməsi baxımından mühüm dəyişiklikdir. Sistemin düzgün işləməsi həm həkimin təyin etdiyi preparatlar barədə məlumatların elektron şəkildə izlənməsinə, həm də pasiyentin eyni və ya oxşar təsirli dərmanları lazımsız yerə almasının qarşısının alınmasına imkan yarada bilər.

Bəs, elektron resept sistemi vətəndaşların dərman xərclərinin azalmasına real olaraq necə təsir göstərə bilər, düzgün preparat və dozanın seçilməsində nə dərəcədə effektivdir və eyni təsirli dərmanların təkrar və ya lazımsız alınmasının qarşısını almaq mümkündürmü?
Mövzu ilə bağlı Sonxeber.az-a açıqlama verən farmakoloq Aydın Əliyev bildirib ki, bu gün səhiyyə ilə bağlı daha çox sualların və problemlərin gündəmə gəlməsi əhalinin digər sahələrlə müqayisədə səhiyyə sisteminə daha çox müraciət etməsi ilə bağlıdır.

"İnsanların səhiyyə xidmətlərinə müraciət etməsinin arxasında isə həyat tərzi, qidalanma və digər amillərlə bağlı müxtəlif problemlər dayanır. Əsas məsələ həkimlərin öz işini düzgün həyata keçirməsidir. Həkim ilk növbədə dəqiq diaqnoz qoymalı və həmin diaqnoza uyğun müalicə təyin etməlidir. Təəssüf ki, Azərbaycanda insanların qonşuların məsləhəti, sosial şəbəkələrdə yayılan məlumatlar və müxtəlif mənbələr əsasında özbaşına dərman qəbul etməsi halları ilə qarşılaşılır. İnsan öz orqanizmini və sağlamlıq vəziyyətini tam şəkildə qiymətləndirə bilməz. Buna görə də dərman seçimi və müalicə ilə bağlı qərar həkim tərəfindən verilməlidir. Vətəndaşlar həkimin tövsiyələrinə əməl etməli, özbaşına dərman qəbulundan çəkinməlidirlər".

Farmakoloq bildirib ki, bununla yanaşı, düzgün və keyfiyyətli qidalanma, sağlam həyat tərzi və gündəlik rejimə diqqət yetirilməsi bir sıra sağlamlıq problemlərinin azalmasına kömək edə bilər:

"Elektron resept sisteminə isə müsbət yanaşıram. Elektron reseptin tətbiqi həkimin təyin etdiyi dərmanların düzgün şəkildə əldə olunmasına və xəstənin müalicə rejiminə daha dəqiq əməl etməsinə imkan yaradır. Dərmanın nə vaxt və hansı dozada qəbul edilməsi, hansı qidalarla birlikdə istifadə olunmasının uyğun olub-olmaması kimi məsələlər də həkim tərəfindən izah edilməlidir. Elektron resept sisteminin digər üstünlüklərindən biri səhiyyə müəssisələrində növbələrin və gözləmə müddətinin optimallaşdırılmasına kömək edə bilməsidir. Ümumilikdə, elektron reseptin tətbiqini səhiyyə sistemi və pasiyentlər baxımından müsbət addım hesab edirəm".

Röyalə Xəyal

Telegramda izləyin