Öldü zənn edib yas tutdular, 10 gün sonra möcüzə baş verdi - VİDEO

Nepalda böyük dağıntılara səbəb olan sel fəlakətindən 10 gün sonra möcüzəvi xilas baş verib. Betrawati bölgəsində sel zamanı itkin düşən yaşlı qadın Çandika Kumari Şrestha dağıntılar arasında sağ tapılıb.

Sonxeber.az xarici mediaya istinadla xəbər verir ki, fəlakətdən sonra Şrestha ilə günlərlə əlaqə saxlamaq mümkün olmayıb. Ailəsi onun sel sularında həyatını itirdiyini düşünərək 11 günlük yas mərasiminə başlayıb. Lakin 10 gün sonra gələn xəbər ailəni heyrətə salıb.

Məlum olub ki, yaşlı qadın sel sularının dağıtdığı dördmərtəbəli evinin qalıqları arasında sağ qalıb. Polis əməkdaşı Mahendra Darnalın sözlərinə görə, xilasetmə qrupları evin ətrafında axtarış apararkən palçıq və dağıntılar arasından "Məni xilas edin" səsini eşidib.

Səsin gəldiyi istiqamətə yönələn ekipajlar təxminən 45 dəqiqə davam edən işdən sonra Şresthanı dar bir boşluqda aşkar ediblər. Yaşlı qadın dağıntılar altından çıxarıldıqdan sonra müalicə olunması üçün hərbi xəstəxanaya aparılıb.

Sel fəlakətindən sonra Betrawati ərazisinin böyük hissəsi dağıntılar və bərkimiş qalın palçıq təbəqəsi altında qalıb. Xilasetmə əməkdaşları binaların qalıqlarını kürəklərlə qazır, bəzi qruplar isə dar boşluqlara daxil olaraq sağ qalanların izinə düşməyə çalışır.

Şresthanın fəlakətdən 10 gün sonra sağ çıxarılması, bölgədə hələ də itkin düşən minlərlə insanın tapılması ilə bağlı ümidləri artırıb.

Telegramda izləyin