Folqa Wi-Fi sürətini artırır - Maraqlı təcrübə

Mətbəxdə istifadə olunan alüminium folqanın zəif Wi-Fi bağlantısını yaxşılaşdıra biləcəyi barədə məsləhətlər internetdə çoxdan yayılır. Bu üsulu sınaqdan keçirənlər evin bir hissəsində məlumat ötürmə sürətinin təxminən beş dəfə artdığını müşahidə ediblər.

Lent.az xarici mediaya istinadla xəbər verir ki, müəllif qarajın yaxınlığındakı müşahidə kameralarının Wi-Fi şəbəkəsinə qoşulmasında yaranan problemi həll etmək üçün routerin arxasına folqadan hazırlanmış əyri əks etdirici yerləşdirib.

Nəticələr bütün otaqlarda eyni olmayıb. Ən nəzərəçarpan dəyişiklik məhz bağlantının zəif olduğu qarajda qeydə alınıb.

Folqa siqnala necə təsir edir?

Metal radiodalğaları əks etdirə bilir. Buna görə düzgün yerləşdirilmiş folqa siqnalın bir hissəsini lazım olan istiqamətə yönəldə bilər. Başqa sözlə, folqa routerin gücünü artırmır, siqnalın yayılmasını dəyişir.

2017-ci ildə Dartmut Kollecinin tədqiqatçıları da bu prinsip əsasında təcrübə aparıblar. Onlar otaqların quruluşuna uyğun hesablanmış, 3D printerdə hazırlanaraq folqa ilə örtülmüş xüsusi konstruksiyadan istifadə ediblər.

Həmin qurğu müəyyən yerlərdə Wi-Fi bağlantısını yaxşılaşdırıb, digər istiqamətlərdə isə siqnalı zəiflədib. Lakin xüsusi hesablamalarla hazırlanan belə bir konstruksiya ilə sadə mətbəx folqasından eyni nəticəni gözləmək olmaz.

Qarajda sürət təxminən beş dəfə artıb

"MakeUseOf"un təcrübəsində ölçmələr üç yerdə aparılıb: routerin yaxınlığındakı iş masasında, yataq otağında və qarajda. Müəllif 2,4 GHz diapazonundan istifadə edərək bağlantını əvvəlcə folqasız, sonra isə folqa ilə yoxlayıb.

Qarajda məlumatların qəbul sürəti saniyədə 3,9 meqabitdən 18,6 meqabitə yüksəlib. Göndərmə sürəti də iki dəfədən çox artıb.

Yataq otağında qəbul sürəti 36,5 meqabitdən 38,2 meqabitə yüksəlib. Routerin yaxınlığındakı iş masasında isə nəzərəçarpan üstünlük qeydə alınmayıb.

Maraqlıdır ki, qarajda sürət artsa da, ölçülən siqnal səviyyəsi ciddi dəyişməyib. Bu da Wi-Fi göstəricisinin bağlantının real sürətini həmişə tam əks etdirmədiyini göstərir.

Bir sınaq qəti nəticə çıxarmağa kifayət etmir

Müəllif hər ölçməni yalnız bir dəfə aparıb. Buna görə nəticələr folqanın bütün evlərdə eyni dərəcədə işləyəcəyini sübut etmir.

Effekt routerin yerləşdiyi yerdən, antenaların istiqamətindən, divarlardan və digər maneələrdən asılı ola bilər. Bir otaqda bağlantı yaxşılaşarkən, başqa otaqda zəifləyə bilər.

Routeri folqaya bükməyin

Bu üsulu sınayarkən folqa ilə cihazın korpusu arasında boşluq saxlamaq və havalandırma dəliklərini açıq qoymaq vacibdir. Routeri tamamilə folqaya bükmək olmaz.

Bağlantı uzaq otaqlarda mütəmadi kəsilirsə, əvvəlcə routeri mebel arxasından və ya otağın küncündən çıxarıb daha açıq, evin mərkəzinə yaxın yerə qoymaq məqsədəuyğundur. Daha geniş sahəni əhatə etmək üçün isə bir neçə cihazdan ibarət Mesh şəbəkəsi alternativ ola bilər.

Telegramda izləyin