AZCON Holding yaradıldı, bəs dövlət şirkətlərinin özəlləşdirilməsi niyə ləngiyir? - İQTİSADÇIDAN AÇIQLAMA

Bir neçə il əvvəl dövlət şirkətlərinin idarə edilməsinin təkmilləşdirilməsi və iqtisadi səmərəliliyin artırılması məqsədilə AZCON Holding yaradılıb. Lakin dövlət müəssisələrinin özəlləşdirilməsi məsələsi hələ də diqqət mərkəzindədir.

Bəs dövlət şirkətlərinin özəlləşdirilməsi niyə ləngiyir? Bu müəssisələrin dövlət mülkiyyətində qalması iqtisadiyyatın inkişafına necə təsir edir və özəlləşdirmə prosesi nə zaman sürətlənə bilər?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, AZCON Holdinqin yaradılması dövlət şirkətlərinin idarə edilməsinin təkmilləşdirilməsi, onların səmərəliliyinin artırılması və gələcəkdə özəlləşdirməyə hazırlanması baxımından mühüm addım kimi qiymətləndirilə bilər. Lakin dövlət şirkətlərinin özəlləşdirilməsinin ləngiməsinin bir neçə səbəbi var. İlk növbədə, bu müəssisələrin maliyyə vəziyyəti, borcları, aktivlərinin real dəyəri və idarəetmə strukturu tam qiymətləndirilməlidir. Zərərlə işləyən və ya səmərəliliyi aşağı olan şirkətlərin özəlləşdirilməsi dövlət üçün gözlənilən gəliri təmin etməyə bilər. Buna görə də əvvəlcə onların fəaliyyətinin yaxşılaşdırılmasına ehtiyac yarana bilər.

Digər mühüm məsələ strateji maraqlardır. Energetika, nəqliyyat, rabitə və digər mühüm sahələrdə fəaliyyət göstərən dövlət şirkətləri ölkənin iqtisadi təhlükəsizliyi baxımından əhəmiyyət daşıyır. Dövlət belə müəssisələri özəlləşdirməzdən əvvəl bazarda rəqabətin təmin olunmasını, inhisarçılıq risklərinin azaldılmasını və xidmətlərin əlçatanlığının qorunmasını nəzərə almalıdır. Bundan başqa, özəlləşdirmə prosesində şirkətlərin dəyərinin düzgün müəyyənləşdirilməsi və şəffaflığın təmin edilməsi də vacibdir.

Bununla yanaşı, dövlət şirkətlərinin özəlləşdirilməsinin gecikməsi özəl sektorun inkişafına və iqtisadiyyata investisiya axınına mane ola bilər. Özəlləşdirmə həyata keçirilmədikdə dövlət həmin müəssisələrin maliyyələşdirilməsi və idarə olunması yükünü daşımaqda davam edir. Buna görə də əsas məsələ bütün dövlət şirkətlərini tələsik satmaq deyil, hansı müəssisələrin özəlləşdirilməsinin iqtisadi baxımdan faydalı olduğunu müəyyənləşdirmək və bu proses üçün konkret, şəffaf yol xəritəsi hazırlamaqdır. AZCON Holdinqin yaradılmasından sonra gözlənilən nəticələrin əldə olunması üçün özəlləşdirməyə uyğun şirkətlər və onların satış meyarları barədə aydın məlumatların açıqlanması vacibdir.

Müəllif: İlkin Məmmədkərimov

Telegramda izləyin