ABŞ Hindistanla münasibətlərdə yeni mərhələyə keçir: Trampın siyasəti Dehlini narahat edir

ABŞ dövlət katibi Marko Rubionun Hindistana son səfəri Vaşinqtonla Dehli arasında münasibətlərin gələcəyi ilə bağlı müzakirələri gücləndirib. The Guardian qəzetinin təhlilinə görə, Rubionun Hindistanın paytaxtı Yeni Dehliyə getməməsi, əvəzində Mumbayda hökumət nümayəndələri və iş adamları ilə görüşməsi ABŞ administrasiyasının xarici siyasətdə iqtisadi maraqlara üstünlük verdiyini göstərir.

ABŞ-Hindistan münasibətləri Donald Trampın ikinci prezidentlik dövründə gömrük rüsumları, Hindistanın Rusiyadan neft alması və Vaşinqtonun Pakistanla əlaqələri səbəbindən gərginləşib. ABŞ əvvəllər Hindistan mallarına tətbiq etdiyi 50 faizlik tarifləri bu ilin əvvəlində 18 faizə endirsə də, tərəflər arasında hərtərəfli ticarət sazişi hələ yekunlaşmayıb.

Sonxeber.az The Guardian-a istinadən xəbər verir ki, Rubionun səfərinin diqqətçəkən məqamlarından biri Hindistanın Qucarat ştatındakı Cəmnaqar neft emalı kompleksinə baş çəkməsi olub. Müəssisə milyarder Mukeş Ambaninin rəhbərlik etdiyi Reliance Industries şirkətinə məxsusdur. Təhlilə görə, Vaşinqton Hindistanın Venesuela neftinin emalında iştirakını artırmaqla ABŞ-da yanacaq qiymətlərinin aşağı salınmasına da nail olmağa çalışır.

Karnegi Beynəlxalq Sülh Fondunun Cənubi Asiya proqramının direktoru Milan Vaişnav hesab edir ki, Tramp administrasiyası beynəlxalq münasibətlərə daha çox sövdələşmə və qısamüddətli iqtisadi qazanc prizmasından yanaşır. Bu isə Hindistanın ABŞ-la uzun illər ərzində qurduğu strateji tərəfdaşlığın gələcək siyasət dəyişikliklərindən sığortalanmadığını göstərir.

Müəllif: İlkin Məmmədkərimov

Telegramda izləyin