Jurnalistləri döyənlər qanun qarşısında necə cavab verəcək? - Hücumların arxasında hansı məsuliyyət dayanır? - VƏKİLDƏN AÇIQLAMA

Jurnalistlərin peşə fəaliyyətini yerinə yetirərkən fiziki zorakılığa məruz qalması media sahəsində narahatlıq doğuran məsələlərdən birinə çevrilib. Son günlər REAL TV və Space TV-nin əməkdaşlarının, ardınca isə APA TV-nin müxbirinin hücuma məruz qalması bu problemin yenidən gündəmə gəlməsinə səbəb olub. Hadisə yerindən çəkiliş aparan, məlumat toplayan və cəmiyyətə həqiqətləri çatdırmağa çalışan jurnalistlərin döyülməsi, təhqir edilməsi və fəaliyyətlərinə mane olunması təkcə media əməkdaşlarının təhlükəsizliyinə deyil, həm də ictimaiyyətin informasiya almaq hüququna toxunur. Bəs jurnalistlərə qarşı fiziki zorakılıq törədən şəxsləri hansı hüquqi məsuliyyət gözləyir?

Peşə fəaliyyətinə mane olmaq məqsədilə media nümayəndələrinə əl qaldıran şəxslər hansı cəzaya məhkum edilə bilər? Qanunvericilikdə nəzərdə tutulan cəzalar belə halların qarşısını almaq üçün yetərlidirmi və jurnalistlərə hücum edən şəxslərin məsuliyyətə cəlb olunması istiqamətində hansı addımlar atılmalıdır?
Mövzu ilə bağlı Vəkillər Kollegiyasının üzvü Cavanşir Qasımzadə Sonxeber.az-a açıqlamasında bildirdi ki, Real TV-nin müxbirinin məktəbdə döyülməsi, eləcə də jurnalist peşəfəaliyyətini yerinə yetirən şəxslərə qarşı törədilən bu cür qanunazid hərəkətlər qanunvericiliyimizlə qəti şəkildə qadağan olunur və sərt məsuliyyət nəzərdə tutur. Onun sözlərinə görə, Azərbaycan Respublikasının Qanunvericiliyinə əsasən, jurnalistlərin qanuni peşə fəaliyyətinə mane olmaq, onlara qarşı zor tətbiq etmək, hədə-qorxu gəlmək və ya əmlakını zədələmək birbaşa cinayət məsuliyyəti yaradır: "Konkret olaraq, Azərbaycan Respublikası Cinayət Məcəlləsinin 163-cü maddəsi jurnalistin qanuni peşə fəaliyyətinə mane olmağı, yəni məlumat yaymağa və ya yaymamağa məcbur etmək məqsədi ilə jurnalistə zor tətbiq etməklə və ya zor tətbiq etmə hədəsi ilə təsir göstərməyi cinayət hesab edir. Bununla yanaşı, törədilən əməlin xarakterindən asılı olaraq həm də Cinayət Məcəlləsinin digər maddələri - xüsusilə qəsdən sağlamlığa zərər vurma, xuliqanlıq və ya özgənin əmlakını qəsdən məhv etmə və ya zədələmə maddələri ilə də hüquqi qiymət verilə bilər.

Jurnalistin döyülməsi və peşə fəaliyyətinə mane olunması halları üzrə təqsirli bilinən şəxslər əməlin ağırlıq dərəcəsindən asılı olaraq min manatdan az olmayan miqdarda cərimə, ictimai işlər, islah işləri və ya müəyyən müddətə azadlıqdan məhrumetmə cəzaları ilə cəzalandırıla bilərlər. Xüsusilə zor tətbiq etməklə, qrup halında və ya xuliqanlıq niyyəti ilə törədildikdə cəzanın ağırlıq həddi daha da artır".

Müəllif: İlkin Məmmədkərimov

Telegramda izləyin