Deputat: Maaş və pensiyalar artırılsın

Tarif Şurasının müvafiq qərarı ilə "Aİ-92" markalı avtomobil benzininin pərakəndə satış qiyməti artırılaraq, 1 litr üçün 0,90 AZN müəyyən olunub. Bu digər sahələrə nə kimi təsir göstərəcək?

Milli Məclisin İqtisadi siyasət, sənaye və sahibkarlıq komitəsinin üzvü millət vəkili Əli Məsimli Sonxeber.az-a açıqlamasında benzinin qiymətinin bahalaşmasının bütün sahələrə təsir edəcəyini bildirib.

Onun sözlərinə görə, benzinin bahalaşması nəqliyyatla bağlı sahələrdə qiymət artımına səbəb olacaq. O cümlədən nəqliyyatda daşınan məhsulların maya dəyərində artan məbləğ özünü büruzə verəcək.

Millət vəkili vurğulayıb ki, qiymət artımı olanda hərmişə əhali arasında panika təsiri yaranır. Sahibkarlar benzinin qiyməti bahalaşdığından digər məhsulların da qiymətini qaldırmağa çalışırlar. Bu bahalaşma xüsusən aztəminatlı təbəqənin nəqliyyatına, aldığı məhsulların qiymətinə təsir edəcək. Ümumiyyətlə benzinin qiymətini qaldırmağa bir əsas yox idi. Hansısa təşkilatların təsərrüfatsızlığının, idarəetmə meyarının aşağı səviyyədə olması bahalaşmaya gətirib çıxardı. Bu baxımdan onlar maya dəyərinin aşağı salınması istiqamətində işlər görsünlər ki, onların fəaliyyətinin mənfiliklərindən əhali əziyyət çəkməsin".

"Benzinin bahalaşması nəqliyyat xərclərinə birbaşa təsir göstərəcək və qiymət qalxacaq. Bu da öz növbəsində nəqliyyat sektorunda daşımaların qiymətini artıracaq. Daşımada qiymət artacaqsa dolayı yolla daşınan məhsulların, əhaliyə ən çox lazım olan məhsulların bahalaşmasına gətirib çıxaracaq. Nəticə etibarı ilə əhalinin aldığı məhsulların bahalaşmasına təsir edəcəksə deməli aztəminatlı təbəqənin əməkhaqlarının, pensiyalarının artırılması, sosial müdafiəsinin gücləndirilməsi istiqamətində əlavə tədbirlər görülməsinə ehtiyac var. Benzinin qiyməti qalxıbsa nəqliyyatın bütün sahələrində artım olacaq. Avtobus dəmiryol nəqliyyatında bahalaşma olacaq.Bu baxımdan maaşların pensiyaların artırılması istiqamətində əlavə tədbirlər görülməsi vacibdir".-Əli Məsimli deyib.

Millət vəkili benzinin bahalaşmasının kommunal xidmətlərə təsir edəcəyinə də münasibət bildirdi:

"Bu proses kommunal xidmətlərə dolayı yolla təsir göstərəcək və bu psixoloji təsiri ola bilər. Bu zəncirvari psroses kimi bir müddət sonra kommunal xidmətlərdə qiymətlərin artmasına təsir göstərəcək".

Aysel Kərimova

Telegramda izləyin

instagramda izləyin