"Bozbash pictures"-ın Qılmanı: "İlkinin yerində olub, özünü yekəxana aparmaq istəyənlər çoxdur" - FOTO

Tanınmış aktyor İlkin Misgərlinin müsahibəsi.

- İlkin Misgərli kimdir?

- İlkin Misgərli orta yaşlı, orta istedada malik olan, məsuliyyətli və çəkilişə gecikməyən bir aktyordur.

- Çəkilişə gecikən aktyorlar çoxdur?

- 9-da çəkiliş olacaq,12-də çəkilişə gələn aktyorlar var. Çox şükür ki, bu hallar bizim komandada baş vermir.

- Neçə ildir ki, "Bozbash pictures"ə çəkilirsiz?

- Artıq 3-cü mövsümdür ki, mən "Bozbash pictures" ilə çalışıram və çox şadam.

- Niyə məhz Qılman doktor?

- Maraqlı adları bizdə həmişə obrazlara İlkin Həsəni qoyub. İlkin Qılman adını mənə deyəndə çox güldüm. Çox maraqlı addır. Mən Qılmanı necə təsəvvür edirdimsə, elə də oynayıram. Çox savadsız, işini bacarmayan bir həkim obrazı yaratmağa çalışıram. Uzman Qılman həkim mamaçadır, amma bütün ixtisaslarla maraqlanır. Həm cərrahdır, həm uşaq həkimidir.

- Başqa obrazda oynamaq istərdinizmi?

- Təbii ki, həmişə Qılmanı oynamaq istəmərəm, bu obraz "Bozbash pictures"-ə məxsus obrazdır. Bir çox filmlərdə oynamışam. "My name is İntiqam" filmində Syoma obrazını oynamışam. Çox fərqli obrazdır. Təklif gəlsə, təbii ki, başqa rollar da oynayaram.

- "Bozbash pictures"ə ən son siz qoşulmusuz. Adaptasiya çətin olmadı ki?

- Mən 2000-ci ildən İlkin Həsəni ilə "potok" yoldaşı olmuşam. Mən dram və kino aktyor fakültəsini, həmkarım İlkin isə televiziya rejissorluğu fakültəsini bitirib. Bizim dostluğumuz, münasibətimiz o illərdən davam edir. Daha sonra isə komandanın digər üzvləri ilə tanışlığım başlayıb. Mən "Bozbash pictures"in bir nömrəli tamaşaçısı idim. Nicat Rəhimov mənim qonşumdur, tez-tez onunla bu haqda söhbətlər edirdim.

- Sizi komandaya kim cəlb etdi?

- Məni komandaya İlkin dəvət etdi. Bir il sonra öyrəndim ki, məni İlkinə Nicat təklif edib.

- Nə vaxt məşhur oldunuz?

- Mən deməzdim ki, məşhuram. Məşhur olmağıma, hələ ki, var. Etiraf edim ki, məni "Bozbash pictures" məşhur etdi. İlk efir günündən sonra telefonuma gələn zənglərdən hiss etdim ki, burada daha çox sevildim, nəinki digər layihələrdə.

- Çox maraqlıdır ki, Salyan ləhcəsi ilə danışırsınız.

- Bəli, salyanlıyam. Ata tərəfim Salyan, ana tərəfim Neftçaladandır. Demək olar ki, uşaqlığım Neftçalada keçib. Bu bölgənin şirin ləhcəsi var deyə bu cür danışıram.

- "Stalinin başı" filmi hələlik sizin son çəkildiyiniz ekran işidir. Çəkiliş arxasında nələr baş verib?

- Nələr baş vermədi ki? Yorğunluq, yuxusuzluq... Amma film haqqında deyilən yüksək fikirlər məni bir anlığa xoşbəxt etdi.

- Nə vaxtsa aktyor sənətini seçdiyiniz üçün peşman olmusuz?

- Həmişə fikirləşirdim ki, görəsən, mən efirə çıxıb, nəsə oynaya bilərəm? Şükürlər olsun ki, dostlarımın sayəsində bu gün bütün bunlara nail olmuşam.

- Qonorarsız çəkildiyiniz film olub?

- İlk çəkildiyim filmdə, demək olar ki, pulsuz oynamışam.

- Bəs "Bozbash pictures"dəki qonorardan razısız?

- Şükürlər olsun!10 il bundan öncə geriyə baxsaq, aktyorlar üçün bu qədər şərait yaradılmamışdı. Çox istərdim ki, bizim aktyorlar da Hollivuddakı aktyorlar kimi yüksək qonorar alsınlar.

- Bir milyon manatı təsəvvür edirsiniz?

- Təsəvvür etmirəm, eşitsəm, yıxılaram (gülür).

- Rayonlarda çox çəkilişlərdə olursunuz. İnsanların sizə qarşı münasibəti necədir?

- Həqiqətən, insanlar bizim çəkiliş meydançamıza axışıb gəlirlər. Bir-birlərinə zəng edib, xəbər verirlər. Bu kimi hallar, təbii ki, bizə çox xoş gəlir.

- Həyatda zarafatcılsınız, yoxsa ciddi?

- Dostlarımla, yaxınlarımla zarafat etməyi xoşlayıram. Çünki bilirəm və tanıyıram. Amma kənarda çox ciddiyəm.

- "Bozbash pictures"in ən sadə aktyoru kimdir?

- Əlbəttə ki, İlkin Həsəni. İlkin Həsəni uzun müddətdir ki, televiziyadadır. İlkinin yerində olub, özünü yekəxana aparmaq istəyənlər çoxdur. Biz İlkini məhz sadəliyinə görə çox istəyirik.

- Bəs siz necə?

- Mən və digər komanda üzvləri də sadədir.

- Hansı aktyorun fanatı daha çoxdur?

- Daha çox Fəlakətə görə gəlirlər çəkiliş meydançasına. Amma bu, o demək deyil ki, bizim sevənlərimiz yoxdur. Hər bir aktyorun ayrı-ayrılıqda sevən tamaşaçıları var./milli.az

Telegramda izləyin