Yollarımız da pullu olacaq: Bəs buna ehtiyac varmı?

"Azərbaycanda ödənişli yollar dövlətin, özəl və bələdiyyənin də ola bilər. Özəl olan yolları hansısa qurum tikməlidir və burada dövlətin, bələdiyyətinin vəsaiti xərclənməməlidir. Özəl yolu hansısa şirkət, hüquqi şəxs tikməlidir. Hazırda Azərbaycanda özəl yol yoxdur. Özəl yol olmadığına görə də ödənişli özəl yol da olmayacaq".

Bunu Sonxeber.az-a yol-nəqliyyat məsələləri üzrə tanınmış ekspert, hüquqşünas Ərşad Hüseynov Azərbaycanda pullu yolların tikilmə perspektivi məsələsinə münasibət bildirərkən deyib.

Pullu yolun şərtləri

Onun sözlərinə görə, qanuna əsasən dövlətin və bələdiyyənin də yolu ödənişli ola bilər. Ekspert vurğulayıb ki, ancaq bunun ciddi şərtləri var və bunlara riayət etmək lazımdır: "Əsas şərt ondan ibarətdir ki, ödənişli yolun mütləq ödənişsiz alternativi olmalıdır. Yəni iki məntəqəni birləşdirən yeganə yol heç vaxt ödənişli ola bilməz. İki məntəqəni birləşdirən yol o vaxt ödənişli ola bilər ki, həmin məntəqələri birləşdirən daha bir yol olsun. Məsələn, buradan Şamaxıya gedən yol ödənişli ola bilməz. Buradan Şamaxıya gedən yolun ödənişli olması üçün oraya gedən başqa bir yol, alternativ yol olmalıdır".
Ə. Hüseynov qeyd edib ki, digər şərtə əsasən, ödənişsiz yolun alternativi olan pulsuz yol tam rahat, təhlükəsiz və dövlət standartlarına uyğun hərəkət üçün yararlı olmalıdır: "Ödənişsiz yolun torpaq yol və keyfiyyətsiz olması, bunun müqabilində isə yaxşı tikilmiş yolun ödənişli olması yolverilməzdir. Bu şərtlər daxilində hansısa yol ödənişli ola bilər".

Hökumət bu yolu ödənişli etmək istəyir

Ekspert diqqətə çatdırıb ki, hazırda Azərbaycan ərazisində həmin tələblərə cavab verən heç bir yol yoxdur: "Amma ödənişli yolların tikilməsi nəzərdə tutulub. Əsas hədəf tikə bilsələr cənub istiqamətindədir: Ə, Ələt-Astara-İran sərhədi yolu. O yolun Salyan rayonu ərazisindən başlayıb Masallı ərazisinə qədər olan hissəsinin alternativ kəsə yolu var. Onun da köhnə alternativi var ki, bu da Biləsuvar, Cəlilabad ərazisindən keçərək Massalıya həmin nöqtəyə gedib çıxır. Bildiyimə görə hökumətin bu yolu ödənişli etmək fikri var. Amma onu bir halda etmək olar ki, köhnə yolu tam bərpa edib təmir etsinlər. Hazırda köhnə yol bərbad vəziyyətdədir. Onu bərpa etməmiş, təmir etməmiş həmin qısa yolu ödənişli etmək mümkün deyil".

Pullu yol neçəyə olacaq?

Ödənişli yolların qiymətinə gəlincə, o deyib ki, qanuna görə ödənişli yolun qiymətini dövlət başçısı müəyyən edir: "Dünya təcrübəsinə əsasən, ödənişli yollarda qiymətlər yüksək ola bilməz, çünki yüksək ödəniş olacağı təqdirdə, sürücülər həmin yollardan istifadə etməyəcəklər. Ödənişlər adətən rəmzi rəqəmlər olur. Azərbaycan Avtomobil Yolları Dövlət Agentliyi daha əvvəl də açıqlamışdı ki, 1 kilometr üçün ödənişin məbləği 4-7 qəpik ola bilər. Məqsəd ondan ibarətdir ki, həmin ödənişlər hesabına yolun cari saxlanma xərcləri qarşılansın. Yola qoyulmuş xərcləri geri götürmək məqsədi daşımır. Həmin pullarla qoyulmuş xərcləri geri götürmək mümkün deyil".

Məftun Salmanov

Telegramda izləyin