Ermənistan Azərbaycanın təcridetmə siyasətini yara bilərmi? - Deputatdan VACİB AÇIQLAMA

"Ermənistan yeritdiyi işğalçılıq siyasəti ucbatından həm Azərbaycan, həm də Türkiyə tərəfindən iqtisadi və nəqliyyat blokadası vəziyyətinə salınıb".

Bunu Sonxeber.az-a Milli Məclisin deputatı Elman Nəsirov Ermənistanın İran və separatçı Abxaziya, Cənubi Osetiya bölgələri vasitəsilə düşdüyü iqtisadi ağır vəziyyətdən çıxma ehtimallarına münasibət bildirərkən deyib.

Onun sözlərinə görə, Ali Baş Komandan İlham Əliyev çıxışlarında dəfələrlə qeyd edib ki, bu, Ermənistanın yeritdiyi məhz aqressiv siyasətin nəticəsidir: "Bunun da çıxış yolu da var. Çıxış yolu da ondan ibarətdir ki, Ermənistan ordusu işğal olunmuş ərazilərimizdən çıxsın, işğala son qoyulsun. Bu halda yeni şərait yaranır. Ermənistanla bağlı yeridilən təcridetmə siyasətinə baxıla bilər. Paşinyan rejimi bunu nə qədər tez dərk etsə, bir o qədər yaxşı olacaq. Əks halda uzaqda olmayan perspektivdə yeni inqilab Ermənistanı öz ağuşuna ala bilər".

E. Nəsirov qeyd edib ki, Ermənistan isə bu halda çabalıyır və vurnuxur: "Ermənistanın Baş naziri Nikol Paşinyan iqtisadi inqilab edəcəyinin anonsunu vermişdi. Blokadada olan ölkədə iqtisadi inqilab etmək qeyri-mümkündür. Belə olan şəraitdə o, düşdüyü vəziyyətin diktəsi altında çabalamaqdadır və müxtəlif yollar, variantlar axtarır. Onların daha çox nəzərdən keçirdiyi iki variant var. Birincisi, İranla azad iqtisadi zona açmaq, ikincisi, analoji addımı separatçı Abxaziya və Cənubi Osetiya bölgələri ilə atmaqdır. Bununla Ermənistan İran və Rusiya ilə iqtisadi bağlılığı artırmağ hədəfləyir. İrəvan bu yolla düşdüyü ağır iqtisadi vəziyyətdən çıxmağı planlaşdırır".

Ancaq millət vəkili hesab edir ki, sadalanan planlar nəticəsi olmayan məsələlərdir: " Çünki Ermənistan kiçik, zəif və perspektivi olmayan bazara malikdir. Ölkə istehsalı çox aşağı səviyyədədir, iqtisadiyyatının mütləq hissəsi Rusiyanın nəzarəti altındadır. Belə olan halda Ermənistanın İran üçün əhəmiyyəti və aktuallığı azalır. Xüsusən indi çabalayan, vəziyyətdən çıxmaq müxtəlif yollar axtaran Ermənistanın İranla bu sahədə əməkdaşlığa nəfəslik kimi baxması ona digər problemlər yaradır. Bu, ABŞ-ın İrana qarşı sanksiyaları fonunda baş verə bilər. ABŞ Çin, Rusiya, Hindistan kimi böyük dövlətlərə təzyiq göstərir ki, İranla enerji sahəsində əməkdaşlığı dayandırsın və demək olar ki, buna da nail olur. Bu reallıqda cırtdan bir dövlətin İranla azad ticarət zonası yaratmaq xətti təbii ki, Vaşinqtonda diqqətlə izlənilən və çox mənfi qarşılanan addımdır. Ermənistan guya özünün bir problemini həll etdiyi halda, özü üçün daha böyük problemlər tapa bilər".

Məftun Salmanov

Telegramda izləyin

instagramda izləyin