Bir gecədə 11 avtomobildən oğurluq edən şəxsin məhkəməsi başlayır

Bakıda avtomobillərdən oğurluq edən Nicat Qasımzadənin cinayət işi üzrə ibtidai istintaq başa çatıb.
Sonxeber.az "Report"a istinadən bildirir ki, cinayət işi baxılması üçün Xətai Rayon Məhkəməsinə göndərilib. Hakim Cavid Hüseynin icraatında olan iş üzrə hazırlıq iclası iyulun 18-nə təyin edilib. Qeyd edəık ki, N.Qasımzadə Cinayət Məcəlləsinin 177.2.1-ci (qabaqcadan əlbir olan bir qrup şəxs tərəfindən oğurluq) maddəsi ilə ittiham olunur. Gecə saatlarında avtomobillərin şüşələrini sındıraraq nəqliyyat vasitələrinin salonlarından oğurluq edən Gəncə şəhər sakini Nicat Qasımzadə bu ilin aprel ayında Xətai rayonunda cinayət başında tutulub. Saxlanılan şəxsin ətrafında 37-ci Polis Şöbəsində araşdırma aparılan zaman onun bir gecədə 11 avtomobilin şüşəsini sındırdığı məlum olub. N.Qasımzadə qeyd edilən cinayətləri paytaxt sakini Ceyhun Abbasovla birlikdə törətdiyini bildirib. Ceyhun Abbasov bir neçə ay əvvəl analoji cinayətlər etdiyi üçün polislər tərəfindən saxlanılsa da, həmin vaxt yetkinlik yaşına çatmadığından onun barəsində həbs qətimkan tədbiri seçilməyib. Araşdırma zamanı müəyyən edilib ki, dəstə üzvləri müxtəlif vaxtlarda avtomobillərin salonlarından, əsasən, pul və digər qiymətli əşyalar oğurlayıblar. Onlar şüşəsi sındırılan nəqliyyat vasitələrinin birinin salonundan isə 1000 manat ələ keçiriblər.

Telegramda izləyin