Ferması yanan kişinin sözləri diqqət çəkib

Türkiyənin Bolu vilayətinin Mudurnu rayonunda Niyazi Cengizə məxsus boş hind quşu fermasında baş verən yanğın yanğınsöndürənlərin müdaxiləsi ilə nəzarət altına alınıb.

Sonxeber.az türk mediasına istinadən xəbər verir ki, Mudurnunun Hacıhalimlər kəndində yerləşən və 7 min tutumlu olan boş hind quşu fermasında naməlum səbəbdən yanğın baş verib. Qısa müddətdə alovlanan yanğın küləyin təsiri ilə daha da güclənib.

Yanğını görən sakinlər dərhal 112 Təcili Zəng Mərkəzinə məlumat veriblər. Hadisə yerinə jandarma və çoxsaylı yanğınsöndürən briqadalar cəlb olunub. Alovlar nəticəsində baxıcı otağı tamamilə yanaraq külə dönüb, fermaya isə qismən ziyan dəyib. Yanğın ekipajların səyi ilə söndürülərək nəzarət altına alınıb.

Hadisə zamanı ferma sahibi Niyazi Cengizin fermaya baxan tərəfdə dayanaraq siqaret çəkməsi də diqqətdən qaçmayıb. O bildirib ki, hind quşları üç gün əvvəl fermadan çıxarılıb: "Canımız sağdır, mən də yana bilərdim. Hind quşlarını 2-3 gün əvvəl burdan çıxardıqdan sonra kəndə getmişdim. Kənddə olarkən dostlar, qonşular zəng edib xəbər verdilər. Fermada o vaxt heç kim yox idi".

Faktla bağlı yanğının başvermə səbəblərinin müəyyənləşdirilməsi üçün araşdırma aparılır.

Telegramda izləyin