İştahsız pişiklərini baytara aparan cütlük görün nəylə üzləşdilər

Türkiyənin Mersin şəhərində pişiklərini baytar müayinəsinə aparan cütlük gözləmədikləri bir həqiqətlə üzləşib. Ramazan Alper İlten və nişanlısı Fatma Zühal Yurdagül qar gəzintisi üçün Toroslar rayonunun yüksək dağlıq ərazisində yerləşən Arslanköy məhəlləsinə gediblər. Gəzinti zamanı mehriban davranışları ilə diqqətlərini çəkən bir pişiyi üşüməməsi üçün özləri ilə götürüblər.

Sonxeber.az türk mediasına istinadən xəbər verir ki, zamanla pişiklə aralarında bağ yaranan cütlük onu sahiblənmək qərarına gəlib. Pişiyin iştahasız olması və peyvəndlərinin vurulması üçün onu Mersinin Yenişehir rayonunda yerləşən baytarlıq klinikasına aparıblar.

Baytar həkimlər Ömər Sağdıç və Furkan Toroğlu tərəfindən aparılan müayinə və rentgen müayinəsi zamanı "Amber" adı verilən pişiyin bud nahiyəsində güllə qəlpəsinin olduğu müəyyən edilib. Aparılan cərrahi əməliyyat nəticəsində yad cisim çıxarılıb və pişik sağlamlığına qovuşub.

Baytar həkim Ömər Sağdıç bildirib ki, güllə qəlpəsinin uzun müddət bədəndə qalması zəhərlənməyə səbəb ola bilərdi:
"Bu riski nəzərə alaraq əməliyyat etdik. Hazırda pişiyin vəziyyəti çox yaxşıdır və normal həyatına davam edir".

Furkan Toroğlu isə cütlüyə həssas və məsuliyyətli yanaşmalarına görə təşəkkür edib:
"Yad cismi pişiyin bədənindən çıxardıq, artıq hər şey qaydasındadır. Küçədən sahiblənilib və indi isti, təhlükəsiz bir evi var. Biz də onun üçün çox sevinirik".

Hazırda "Amber" yeni sahibləri ilə birlikdə sağlam və təhlükəsiz həyatını davam etdirir.

Telegramda izləyin