"Azərbaycan xalqı bir əsrdə iki dəfə müstəqillik əldə edib"- Millət vəkili

Bu gün Azərbaycanın dövlət müstəqilliyini bərpa etməsindən 28 il ötür.

Bununla bağlı Sonxeber.az-a danışan Milli Məclisin İctimai birliklər və Dini Qurumlar Komitəsinin üzvü, deputat, hakim Yeni Azərbaycan Partiyasında təmsil olunan Cavanşir Paşazadə bildirib ki, müstəqilliyi qoruyub saxlamaq onu qazanmaqdan çətindir. Azərbaycan xalqı bir əsrdə iki dəfə müstəqillik əldə etməklə, özünün suveren dövlətini yaratmaq imkanı qazandı. 1918-ci ildə qurulmuş Azərbaycan Xalq Cümhuriyyəti cəmi 23 ay yaşadı. İkinci tarixi imkan bir də 70 il sonra yarandı. Sovet imperiyasının dağılması prosesi Azərbaycan xalqına öz milli müstəqilliyini bərpa etmək imkanı verdi. 1991-ci il oktyabrın 18-də Azərbaycan Respublikası Ali Sovetinin sessiyasında "Azərbaycanın dövlət müstəqilliyi haqqında Konstitusiya Aktı" qəbul olundu.
Dövlət Müstəqilliyi haqqında Konstitusiya Aktı 1991-ci il oktyabrın 18-də qəbul edilsə də, Azərbaycan özünün əsl müstəqilliyini ümummilli lider Heydər Əliyevin qayıdışından sonra əldə etdi. Bilirsiniz ki, müstəqiliyimizin ilk illərində ölkəmizdə xaos, özbaşınalıq hökm sürürdü. Hakimiyyətdə olanlar sadəcə öz ciblərini güdür, yüksək vəzifəyə gəlmək üçün çalışırdı. Ordudan söhbət belə gedə bilməzdi. Sadəcə könülülərdən ibarət dəstələr var idi. Təəssüf ki, o könüllü dəstələrin bəziləri məlum şəxslərə tabe idi. Onların göstərişi ilə hərəkət edirdilər. Əlbəttə vətəni və xalqı üçün canından keçən oğul və qızlarımız da az deyildi. Onlar ölkəmizin müstəqilliyi üçün düşünmədən canlarını fəda etdilər".

Deputat vurğulayıb ki, ölkəmizin xilası Ulu Öndər Heydər Əliyevin adı ilə bağlıdır:
"Ulu Öndər Heydər Əliyev zamanında Bakıya qayıtmasaydı, bu gün dövlətimiz müstəqillik əldə edə bilməzdi. 1993-cü ilin 15 iyununda xalqın təkidli tələbi ilə hakimiyyətə gələn Heydər Əliyev özü ilə bərabər Azərbaycana siyasi müdriklik gətirdi. Məhz milli liderin zəngin siyasi təcrübəsi, yüksək idarəçilik bacarığı, vətənə olan tükənməz sevgisi Azərbaycanın dövlət müstəqilliyini təhlükədən qurtardı. Ulu Öndər qarşıya çıxan bütün çətinliklərə xalqın xoşbəxt gələcəyi naminə sinə gərdi və qısa vaxt ərzində Azərbaycanın səsi ən nüfuzlu beynəlxalq təşkilatların kürsüsündən gəldi. Müstəqilliyin əvəzsiz bir nemət olduğunu və xalqın tarixi taleyində çox önəmli rol oynadığını böyük qürur hissi ilə bəyan edən Heydər Əliyev Azərbaycanın müstəqilliyini əbədi yaşar və dönməz etdi. Əsil müstəqillik isə öz sərvətlərinin tam sahibi olmaqdır. 1994-cü ilin 20 sentyabrında Heydər Əliyevin müəllifi olduğu nəhəng neft müqaviləsi "Əsrin müqaviləsi" imzalandı. Bununla da Azərbaycan ilk dəfə olaraq öz sərvətlərinin sahibi kimi çıxış etdi. Dünyanın ən aparıcı dövlətlərinin və qabaqcıl şirkətlərinin bu kontraktda iştirakı isə ölkəmizin regionda əhəmiyyətini və nüfuzunu artırdı. Azərbaycan iri regional layihələrə, Avropanın və bütövlükdə dünya enerji təhlükəsizliyi sisteminə qoşuldu. 1993-cü ildən başlayaraq dövlət müstəqilliyinin möhkəmləndirilməsi istiqamətində görülən işlər və atılan məqsədyönlü addımlar Azərbaycanın bugünkü uğurları üçün ən etibarlı təməl oldu. Bir sözlə ,əgər müstəqillik Azərbaycanın suveren dövlət kimi mövcud olması tarixi zərurətdən irəli gələn hadisə idisə, Azərbaycanın müstəqilliyinin əbədiliyi və dönməzliyi Ümummilli Lider Heydər Əliyevin adı və fəaliyyəti ilə bağlı olan müasir tariximizin danılmaz faktıdır. Məhz dövlətimizin müstəqilliyi, bu müstəqilliyin yaradıcısı və memarı Heydər Əliyev yeni və qlobal dünyada ölkələrin sırasında Azərbaycanın öz yerini müəyyənləşdirdi".

Cavanşir Paşazadə qeyd edib ki, bu gün cənab prezident İlham Əliyev Ulu Öndərimiz Heydər Əliyevin siyasətini uğurla davam etdirir. 2003-cü ildən prezident seçilən İlham Əliyev son on beş ildə ordumuzu bütün parametrlərlə yüksək səviyyəyə qaldırdı. Artıq bu gün Ali Baş Komandanızımız İlham Əliyevin rəhbərliyi ilə silahlı qüvvələrimiz dünyanın güclü orduları sırasındadır. Azərbaycan silahlı qüvvələri döyüş qabiliyyətinə və maddi-texniki təchizatına görə Cənubi Qafqazın ən güclü ordusu hesab edilir. 2016-cı ilin aprel döyüşləri ordumuz gücünü bütün dünyaya nümayiş etdirdi. Prezident İlham Əliyevin düşünülmüş və uzaqgörən siyasəti nəticəsində ölkə iqtisadiyyatı sürətli və dinamik inkişaf dövrünə qədəm qoydu. Əminliklə deyə bilərəm ki, son illərdə iqtisadi cəhətdən Azərbaycan qədər inkişaf edən ikinci ölkə olmayıb. Cənab prezidentimiz İlham Əliyevin islahatları sosial həyatımıza şəffaflıq gətirdi, bürokratik maneələri aradan qaldırdı. Bir sözlə, Ali Baş Komandanımız Prezident İlham Əliyev yeni əsrin yeni lideri olaraq Azərbaycanı inamla irəli aparır".

Aysel Yusifqızı

Telegramda izləyin