"Əhalinin sıx toplaşdığı ərazidə mitinq təşkil etməyi qarışıqlıq salmaq kimi dəyərləndirirəm"-Millət vəkili

Xəbər verdiyimiz kimi Milli Şura oktyabrın 19-da metronun "28 may" stansiyasının yaxınlığında qanunsuz mitinq təyin edib.

Bununla bağlı Sonxeber.az-a açıqlama verən deputat Sona Əliyeva bildirib ki, şəhərin mərkəzində, əhalinin sıx toplaşdığı ərazidə mitinq təşkil etməyi qarşılıq salmaq kimi dəyərləndirir:
"Həmin ərazi metronun çıxışıdır. Orada universitetlər var və əhalinin daha sıx yerləşdiyi ərazidir. Bundan əlavə, orada hər zaman tıxac olur. Belə bir yerdə mitinq təşkil etməyi mən düzgün saymıram. Düşünürəm ki, bu mitinq əhali tərəfindən də müsbət qarşılanmayacaq. Ölkəmizdə kifayət qədər söz azadlığı var. Mitinq üçün onlara yer ayrılıb. Heç kimə maneə olmadan sizinlə eyni fikirdə olan insanlarla orada piketinizi, mitinqinizi keçirin. Amma çağırış edib, şəhərin mərkəzində mitinq keçirmək yaxşı məqsəd daşımır".

Deputat qeyd edib ki, oktryabrın 19-a təyin olunan aksiya qanunsuzdur: "Mitinqdə asayışı pozanlar qanunla cəzalandırılacaq. Düşüncəsindən asılı olmayaraq, hər bir azərbaycanlıya hörmət edilir. Eləcə də müxalif fikirli insanlar da azərbaycanlıdır. Amma bu, siyasi etika, mədəniyyət tələb edən məsələdir. Daha səviyyəli şəkildə mitinqlər təşkil edə bilərlər. İnsanların rahatçılığını pozmasınlar. Bundan istifadə edib dövlətə qarşı qarayaxma kanpaniyaları aparmasınlar. Azərbaycan dövləti hamımızındır. Dünyadakı çətin vəziyyətdə dövlətimizdə stabillik hökm sürür. Qonşu Türkiyədə və Yaxın Şərqdə baş verənlər gözümüzün önündədir. Azərbaycanı oraya sürükləyək? Rahat və firəvan yaşayırıq. Ola bilər, hər hansı problemlər olsun. Bunu da normal danışmaq və müzakirə etməklə həll etmək olar. Cənab prezidentimiz hər bir hadisəyə dərhal qiymət verir. Cəmiyyətə də onu çatdırır ki, hər bir şeyin fərqindəyəm. Media ilə bağlı məsələləri gündəmə gətirməklə cənab prezidentimiz göstərdi ki, hər şeydən xəbərdardır. Cəmiyyətimizi narahat edən problemlər ictimai müzakirəyə çıxarılır və tezliklə həllini tapır. Problemlər dialoqlu şəkildə öz həllini tapır. Xırda məşiət problemlərini bu cür şişirdib dövlət məsələsinə çevirmək, cəmiyyətdə qarşıdurma yaratmaq çox yanlış bir addımdır. Bu proseslər siyasi mədəniyyət çərçivəsində olmalıdır. Azərbaycan mədəniyyət beşiyi hesab edilir. Lakin özümüz dövlətimizi gözdən salmağa çalışırıq. Müxalifət də anlamalıdır ki, bu dövləti qorumaq lazımdır".

Aysel Yusifqızı

Telegramda izləyin

instagramda izləyin