"Havaların belə keçməsi sağlamlığa ziyandır?" - Terapevtdən açıqlama

Artıq uzun müddətdir ki, ölkəmizdə günəşli hava şəraiti hökm sürür. Hətta bu hava şəraitini yaz havası adlandıranlar da var. Payızda yaşanan yaz havasının gəlişi bütün sahələrə təsir edir. Eləcə də, insan səhhətinə. Anomal havalar xəstəliklərin yaranması üçün əlverişli şərait rolunu oynayır.
Bəs mövcud hava şəraitində özümüzü xəstəliklərdən qorumaq üçün nə edək?
Məsələ ilə bağlı Sonxeber.az-a açıqlama verən terapevt Süleyman Camalov bildirib ki, dəyişkən hava şəraitində diqqətli olmaq lazımdır:
"İndiki havalar orqanizim üçün təhlükəli deyil. Əgər temperatur birdən-birə aşağı düşüb qalxmırsa, deməli narahat olmağa dəyməz. Havaların kəskin isti və ya soyuq olduğu dövrdə əsas məsələ geyim seçimidir. Əsas səhər evdən çıxmazdan əvvəl havanın necə olacağını müəyyən edin və ona uyğun geyinin".
Terapevt bildirib ki, immun sistemi yaya nisbətən payız ayılarında aşağı düşür:
"Müəyyən xəstəlikləri olan adamlar, xəstəliklərə qarşı müqaviməti aşağı olanlar, uşaqlar, yaşlılar dəyişkən havalarda xəstələnməyə daha çox meylli olurlar. Xüsusilə də, o adamlarda yuxarı tənəffüs yollarının infeksiyaları fəallaşır və qripə bənzər əlamətlər başlayır. İnsanlar fəallaşan bu infeksiyaların qarşısını almalıdır. Bunun üçün dərman preparatlarından öncə çoxlu maye qəbul etmək və meyvə-tərəvəz yemək məsləhət görülür. İnfeksiyanın olduğu mühitdə tibbi maskalardan istifadə etmək və əlləri tez-tez yumaq vacibdir".
Lamiyə Məmmədova

Telegramda izləyin

instagramda izləyin